Abaturage bifuza ko inguzanyo y’abajya muri kaminuza itashingira ku budehe

Hari abaturage bahamya ko uburezi buhenze kandi ko ari inkingi ikomeye bityo ko butari bukwiye komekwa ku byiciro by’ubudehe, ahubwo ko buri munyeshuri watsinze akagira uko yoroherezwa kwiga kaminuza.

JPEG - 119.5 kb
Minisitiri Shyaka avuga ko ibyiciro by’ubudehe bishya bigomba gukosora amakosa yakozwe mu bya mbere

Ibyo babitangaje ku wa 17 Gashyantare 2019, ubwo Minisitiri w’Ubutegetsi bw’igihugu, Prof Anastase Shyaka n’abandi bafatanyabikorwa batangaga ikiganiro kuri Radio y’Igihugu kirebana n’imyiteguro y’igikorwa cyo kuvugurura ibyiciro by’ubudehe, abaturage bakaba barahawe urubuga batanga ibitekerezo byabo.

Mukampamije Félicité wo mu karere ka Gisagara, yavuze ko icyiciro cya gatatu arimo ntacyo kimutwaye, ariko ko iyo bigeze ku bana bajya muri kaminuza bimugora.

Yagize ati “Ibyiciro bisanzwe ntacyo byari bitwaye, ikibazo ni uko babihuza n’amashuri y’abana. Nk’ubu ndi mu cya gatatu, kwishyura mituweli ya 3000 nta kibazo, ariko iyo bigeze ku mwana ujya muri kaminuza biragorana kuko bihenze”.

“Ugira utya ukabona umwana muturanye aratsinze ahawe inguzanyo, uwawe yatsinda ntayihabwe ngo ni uko uri mu cyiciro cya gatatu kandi wareba imibereho ugasanga ntirutana cyane. Jye mbona ubutaha ibyiciro by’ubudehe byatandukanywa n’amashuri y’abana, hakarebwa ibindi byagenderwaho”.

Habiyaremye w’i Rubavu na we ati “Mbona icyakorwa ari ukudashingira ku byiciro by’ubudehe mu guha inguzanyo abanyeshuri bajya muri kaminuza. Utayihawe yatsinze kubera icyiciro arimo, mbona ari ukurenganywa, nkumva byahinduka”.

Kuri icyo kibazo, Minisitiri Shyaka yavuze ko bishoboka gutandukanya ibyiciro by’ubudehe n’amashuri kandi ntihagire icyo byica, igikuru ngo ni uko biganirwaho.

Ati “Ndagira ngo mare abaturage impungenge, abantu bashobora gufasha abiga ariko badahekesheje uburezi ubudehe. Hari ukuntu bishobora gukorerwa muri za kaminuza, bityo uwiga agasa n’ukorera ku mihigo, akaba azi ngo natiga ngo atsinde baramureka yirwarize”.

“Ariko ubu n’uwatsindwa ari mu cyiciro cya mbere cy’ubudehe, urakomeza ukamwishyurira agasibira na kabiri cyangwa gatatu. Biragomba kwigwaho tukareba icyakorwa”.

Umuturage ntagomba kuba mu cyiciro cy’ubukene ubuziraherezo

Umuyobozi wa Transparancy International Rwanda (TI), Ingabire Marie Immaculée, wari muri icyo kiganiro, yavuze ko gushyiraho ibyiciro by’ubudehe byari byiza ariko ko ikosa ryabayeho ari uko bitakurikiranywe.

Ati “Leta yagize neza gushyiraho ubudehe, ariko yabaye nka wa mubyeyi utetesha umwana agakabya. Abaturage bari mu byiciro byo hasi bagombaga kuba barasinyanye na Leta amasezerano avuga ko ibafasha mu myaka runaka, bagatera intambwe ubundi bagacuka, bakigira”.

“Ibyo rero ntibyabayeho ari yo mpamvu bahora bumva ko bagomba gufashwa ubuziraherezo, n’abari mu cyiciro cyo hejuru bagatanga ruswa ngo bamanurwe mu cy’abafashwa”.

Umuyobozi w’umuryango w’abanyamakuru baharanira amahoro, Pax Press, Albert Baudouin Twizeyimana, yavuze ko amakosa akenshi yatewe n’uko abaturage bagiye mu byiciro batabifiteho amakuru.

Ati “Abaturage nta makuru bari bafite abamenyesha ibiri mu cyiciro runaka, nk’ubu benshi bishimira kujya mu cya mbere, bagafashwa ariko ntibamenye ko batakwaka inguzanyo kuri Banki ngo bayihabwe. Hari n’abasaba pasiporo ntibayihabwe, ni ngombwa rero ko bahabwa umwanya bagasobanurirwa byimbitse”.

Minisitiri Shyaka yavuze ko ibyiciro bishya bigiye gushyirwaho bizaza bikosora ayo makosa yose yagiye agaragara, kuko umuturage wo mu cyiciro gifashwa azahabwa ubufasha bugaragara bityo atere intambwe ave aho yari ari, yigire, kuko ngo u Rwanda rutakwigira abaturage batifite.

Ibyiciro by’ubudehe byatangijwe mu Rwanda muri 2001, icyo gihe byari bigizwe n’ibyiciro birindwi, biza kuvugururwa muri 2014 ibyiciro bigirwa bine, ari na byo byari bikigenderwaho kugeza ubu.

MENYA UMWANDITSI

PROMOTED STORIES

Ibitekerezo   ( 1 )

Muraho neza,
igitekerezo cyo kuvugurara ibyiciro by’ubudehe, kuko usanga ibihari ubungubu birimo akavuyo kenshi, bityo najye numva gutandukanya iguzanyo ya bourse n’ibyiciro by’ubudehe byaba aribyiza, kuko ufata inguzanyo abazayishyura n’ubundi, bityo ahubwo niba koko n’izo nguzanyo babona zishobora kuba nke nahashingirwe ku manota umwana yagize noneho uwatsinze neza ibe condition yo kubona inguzanyo.

murakoze cyne

Alias yanditse ku itariki ya: 18-02-2019  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka