Nk’uko umwe muri abo baturage yabitangaje. umuganura bahaye Guverineri w’Intara y’Amajyepfo ni ikimenyetso cy’uko ibyo bagezeho babikesha ubuyobozi bwiza bwitaye ku iterambere ryabo.

Mukamugaba Marie, umwe muri abo baturage yabisobanuye atya: “Ntitwahinga ngo tubone umusaruro ushimishije ubuyobozi butabigezemo uruhare mu kudushakira imbuto nziza y’indobanure ndetse n’amafumbire mvaruganda avangwa n’ifumbire yacu y’imbonerera tuba twifitiye mu ngo zacu”.

Uyu muhinzi atanga ubuhamya bw’uko umusaruro wagenze muri uyu mwaka wa 2012 avuga ko yateye ibiro 65 by’ibishyimbo akabisaruramo toni n’igice aribyo byerekana ko ubwo butaka bwabo bushobora kuvamo umusaruro ushimishije mu gihe ikirere kitabatengushye ngo izuba ricane cyane cyangwa se imvura igwe ari nyinshi.

Icyakora muri uyu murenge wa Rwabicuma bavuga ko muri rusange umwaka wa 2012 utabahiriye kuko bagize ibibazo byinshi byatewe n’imihindagurikire y’ikirere izuba rigacana ari ryinshi; nk’uko abaturage babigaragaje mu bibazo bahuye nabyo mu ihinga ry’uyu mwaka.

Guverineri Munyantwari yavuze ko yishimiye icyo giseke cy’umuganura yahawe n’abaturage bo mu murenge wa Rwabicuma wavuye mu musaruro w’ibyo bahinze ku misozi yarwanyijweho isuri ikorwaho amaterasi y’indinganire.

Nk’uko abakecuru n’abasaza bavutse mu Rwanda rwo hambere babivuga, umuganura wabaga mu kwezi kwa Kanama ukaba umunsi mukuru wo kwibuka amasaka ya mbere yasaruwe mu Rwanda.

Icyo gihe umuganura warangwaga no gusangira umutsima w’amasaka bikitwa kuganura ngo umwami ubwe yatekeraga Rubanda muri uwo muhango akavuga umutsima, akagabura maze u Rwanda rwose rugasangira kivandimwe.

Jean Pierre Twizeyeyezu