Nyuma yo gutangaza raporo y’ibyavuye mu biganiro inteko yari imazemo ibyumweru bitatu igirana n’abaturage b’ingeri zose ku ihindurwa ry’ingingo y’101, abadepite n’abasenateri banzuye ko Komisiyo ishinzwe kuvugurura Itegeko Nshinga igomba guhita ishyirwaho, nk’uko abaturage ngo basabye ko iyo ngingo y’101 ihindurwa.

Inteko Ishinga Amategeko yasanze bibaye ngombwa gutangiza igihembwe kidasanzwe cyo gutora itegeko rishyiraho Komisiyo, kuko yari ishoje igihembwe gisanzwe muri uku kwezi kwa Kanama.

Perezida w’Umutwe w’Abadepite, Donatille Mukabalisa, yagize ati ”Iyi komisiyo nta badepite bazayibamo, ahubwo igomba kuba igizwe n’abandi bantu bazadufasha gusuzuma n’izindi ngingo zikeneye kuvugururwa”.

Inteko Ishinga Amategeko ivuga ko abaturage barenga miliyoni imwe n’ibihumbi 800 ari bo bitabiriye ibiganiro ku ihindurwa ry’ingingo y’101; aho abafashe ijambo hafi ya bose basabaga ko Perezida Kagame yagenerwa manda zitagira umubare, kugeza ubwo we azivugira ko atagishoboye kuyobora abanyarwanda.

Abaturage 10 ngo ni bo bonyine banze ko ingingo y’101 y’Itegeko Nshinga yahindurwa, nk’uko raporo y’Inteko ibigaragaza.

Abadepite bavuze kuri raporo y’ibyavuye mu rugendo bakoze, basabye ko iyo raporo yakongerwamo amarangamutima abaturage bagaragaje, aho bamwe bavugaga ko ‘Perezida Kagame natemera ubusabe bwabo bwo gukomeza kubayobora, bazabitangira ikirego’.

Simon Kamuzinzi