Hari abakozi ba Leta, ab’ibigo byigenga ndetse n’ab’imiryango mpuzamahanga ikorera mu Rwanda biyemeje guhuriza hamwe imikorere

Umuryango bahuriyemo witwa ’Rwanda Monitoring&Evaluation Organisation (RMEO), uvuga ko abanyamuryango bazajya bigishanya uburyo bwo gusuzuma imihigo y’ibigo bakorera.

Umuyobozi wa Komite iyobora RMEO, Gatari N Eugene avuga ko kuba umunyamuryango ari ubushake kandi bikaba bikorwa n’umuntu ku giti cye.

Agira ati "Muri aka kazi k’itegurwa, ikurikirana n’izuma ry’imihigo, umuntu akuramo isomo, ibyo nibyo uzajya usangiza abandi ariko na none twakwibaza ngo buri kigo cyashyira mu bikorwa ayo makuru!"

Gatari N Eugene ukuriye Komite iyobora RMEO

Muri 76 bamaze kwinjira muri RMEO harimo abakorera Ikigo gishinzwe Iterambere(RDB) kikaba ari nacyo gitera inkunga uwo muryango, hakaba na bamwe mu bakorera uturere n’abakorera Ubushinjacyaha.

Hari n’abakorera Ministeri y’Ubutegetsi bw’Igihugu (MINALOC), Ministeri y’Ibidukikije, abakorera Kaminuza yigenga ULK, abakorera Umuryango w’Abibumbye mu Rwanda, UNICEF n’Umuryango w’Ubutwererane mu bya tekiniki w’u Bubiligi.

Umukozi wa RDB mu ishami rishinzwe kongerera ubushobozi inzego n’abakozi, Nkusi Felly Karenzi agira ati:"Abagize RMEO bazongera ubumenyi ariko bakaba n’ijisho rya Leta".

Mu igenamigambi ry’imyaka itanu barimo gutegura, abagize RMEO bavuga ko bazaba bafite igipimo gihuriweho kigaragaza uburyo bunoze bwo gukora ikurikirana n’isuzumabikorwa.

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2465 )