Kuri uyu wa Gatanu tariki 21/12/2012, nibwo iri tsinda ryari rihuriwemo n’abanyeshuri bigeze kuba abakuru b’imiryango muri AERG n’ababaye abayobozi bayo, bahuriye ku cyicaro gikuru cya FARG, mu rwego rwo kwerekana ko batibagiwe ibyo bakorewe.

Mu butumwa n’ubuhamya byatanzwe na benshi muri abo banyeshuri, bagaragaje ko ingaruka basigiwe n’ibyo babonye muri Jenoside no kuba barasigaye ari bonyine mu miryango, biri mu byari gutuma kuri ubu bari mu buzima butari bwiza cyangwa bamwe baraniyahuye.

Gusa inkunga bahawe na FARG yabasindagije mu mashuri yabo, bensh bamaze kugera kuri byinshi, ku buryo batagiheranywe n’agahinda k’ibyo baciyemo, ahubwo bahanze amaso imbere, nk’uko byatangajwe na Jean Jacques Dukuze wari uhagarariye iryo tsinda.

Yagize ati: “Umuntu wadukoreye igikorwa cyo kukurihira akaguha ibikoresho, twasanzwe gushima aricyo twakora. Ubu tumaze kugera ahantu hashimishije kuko twageze ku isoko ry’umurimo tukabasha gukoresha ubumenyi twahawe”.

Laurence Iragena nawe wari muri iri tsinda urwangije mu ishami ry’icungamari, yemeza ko gushima bituma uwakugiriye neza akomeza kugira umurava wo gufasha abandi. Akavuga ko bashima FARG kuba yarongeye kubaha icyizere cyo kubaho.

Ku ruhande rw’ubuyobozi bwa FARG, bashimishijwe n’uko abo banyeshuri aribo babashije kuza bwa mbere mu itsinda, kuko abandi baza gushimira ku giti cyabo. Kuza kwabo bigafatwa nk’abana bagarutse iwabo, nk’uuko byatanajwe na Theophile Ruberangeyo uyobora FARG.

Mu byo aba banyeshuri bakanguriwe ni uguharanira kwigira no gufasha abatarabashije kugera aho bageze, kugira ngo ikibazo cyo kumva ko abacitse ku icumu ari bantu bakennye kandi batishoboye byacika, nk’uko byagarutsweho na Jean de Dieu Mucyo, umunyamabanga nshinwabikorwa wa CNLG.

Emmanuel N. Hitimana