Ibi babitangarije mu nama ngarukamwaka y’abapolisikazi yatangiye kuri uyu wa mbere tariki 24/3/2014 mu mujyi wa Kigali, ikaba ibaye ku nshuro ya gatanu ihuza abapolisikazi bahagarariye abandi mu gihugu hose, bakaganira bakanasubiza amaso inyuma ku buzima bwabo nk’abapolisi ariko b’abagore.

IP Viviane Umulisa, yatangarije Kigali Today ko iki cyemezo cyiza gishyigikira ihame ry’uko akazi abapoli b’abagore bakora ntaho gatandukaniye cyane n’ako abandi bakora, kandi bikaba bishimangira inshingano zabo nk’abafite imiryango.

Agira ati "Ni ikintu kinini twishimiye cyane kuko kuba turi abapolisi ntibibuza ko dufite n’ingo zacu, ntibibuza ko tuba dufite inshingano za kibyeyi, tugomba gukurikirana ibintu byose uko bigomba."

Ku ruhande rwa Leta, ngo ishyigikiye ko abapolisikazi babaho neza, bakabasha kwita ku ngo zabo ariko ku isonga bazirikana akazi n’uruhare gafite mu iterambere n’umutekani by’igihugu.

Sheik Musa Fazil Harelimana, minisitiri w’Umutekano ufite n’urwego rwa Polisi mu nshingano ze, yasabye abapolisikazi ko n’ubwo bahawe kwegera ingo zabo ariko bidakwiye gukuraho kuba ijisho rya rubanda.

Ati "Mukwiye kwita kuri izo nshingano ebyiri arizo kwita ku mutekano wa rubanda kandi mukamenya ko ukurusha umugore mwiza aba akurusha urugo rwiza. Mureke rero abandi tubarushe ingo nziza ubwo tuzaba tubarusha no gukora inshingano nziza zo kubungabunga no kurinda umutekano w’Abanyarwanda.”

Abapolisikazi 1,200 bitabiriye iyi nama izamara iminsi ibiri, bazaganira ku kongerera ubumenyi n’ubushobozi abapolisikazi, kwitwara neza ahari ibibazo, bazaganira ku ihame ry’imyumvire ndetse n’uburyo bwo kongera umubare w’abapolisikazi mu mwuga.

Ubwo Polisi y’u Rwanda yajyaho, umubare w’abagore n’abakobwa wari ku kigero gito cyane, kuko mu bapolisi ibihumbi bitatu bari mu Rwanda, abagore ntibarengaga 30. Kuva icyo gihe ariko hagiye hagaragara impinduka zirimo kubongera mu mubare, mu bumenyi no guteza imbere ubwuzuzanye bw’Abanyarwanda bose.

Emmanuel N. Hitimana