KT TV
Abapolisi basoje amahugurwa y’ibanze ku gucunga umutekano w’ibibuga by’indege
Kuri uyu wa kabiri tariki 16/10/2012, abapolisi 20 basoje amahugurwa y’iminsi 14 agamije guha abapolisi bakorera ku kibuga cy’indege ubumenyi bukenewe mu rwego rwo kurushaho gukaza umutekano ku kibuga cy’indege.
Muri iyo minsi 14, abahabwaga amahugurwa bahawe ubumenyi butandukanye burimo gusaka abagenzi n’imizigo yabo ngo barebe ko batatwaye ibintu bitemewe nk’intwaro, ibintu bishobora guteza inkongi y’umuriro n’ibindi.
Aya mahugurwa yaberaga ku cyicaro gikuru cya polisi ku Kacyiru yatanzwe ku bufatanye hagati ya polisi y’igihugu n’ikigo cy’igihugu gishinzwe indege za gisivili (RCAA).
Mu muhango wo gusoza aya mahugurwa, umuyobozi mukuru wungirije wa polisi y’igihugu DIGP Stanley Nsabimana yashimiye RCAA uruhare ikomeje kugira yongerera ubumenyi abapolisi bacunga umutekano ku kibuga cy’indege.
Yasabye abayahawe gushyira mu bikorwa ubumenyi bahakuye no gufatanya n’izindi nzego zikorera ku kibuga cy’indege gukaza umutekano wacyo.
Claver Bazatoha, umuyobozi ushinzwe umutekano w’abagenda mu ndege muri RCAA, nawe yasabye aba bapolisi kuzabyaza umusaruro aya mahugurwa buzuza inshingano zabo.
AIP Richard Tumusime, umwe mu basoje amahugurwa yatangaje ko ari ingirakamaro kandi ko ubumenyi bahawe bazabusangiza abandi bapolisi bakorana mu rwego rwo kurushaho gukaza umutekano.
Emmanuel Nshimiyimana
Ibitekerezo
Ohereza igitekerezo
|
|
