Ibi babisabwe kuwa mbere tariki 30/07/2012 na Ministre w’Intebe Dr. Pierre Damien Habumuremyi ubwo yatangiza ku mugaragaro icyiciro cya gatanu cy’itorero ry’urubyiruko rw’Abanyarwanda baba mu mahanga ribera i Gako mu ishuri rya gisirikare riri mu karere ka Bugesera.

Yagize ati “Ndagirango rubyiruko nk’uhagarariye Guverinoma n’abaminisitiri turi kumwe hano, tubamare impungenge tubabwize ukuri ko ibyo bashinja U Rwanda byose ari ibinyoma. U Rwanda ntacyo rutakoze ngo muri aka karere dutuyemo by’umwihariko muri Congo habemo amahoro”.

Ministre w’Intebe, Dr. Pierre Damien Habumuremyi, yavuze ko ubu butumwa buhawe intumwa 258 b’abahungu n’abakobwa kandi akaba yizeye ko bazabugeza ku isi yose kuko byagaragaye ko nta cyananira Abanyarwanda.

Minisitiri w’urubyiruko acinya akadiho n’abari mu ngando.

Iri torero hari abifuzaga cyane kuryitabira, harimo abavuye muri Malawi bakoze urugendo rw’iminsi itanu batega imodoka bava Malawi bagera mu Rwanda.

Umwe muri abo witwa Karangwa Jean Bosco yagize ati “ ikintu nashakaga kugeraho nari maze igihe ntagera mu Rwanda, ibyarwo nabyumvaga ku mateleviziyo na internet nkumva mfite inyota yo kurureba nkavuga nti niyo namara ukwezi mu nzira mpagere”.

Iki ni icviciro cya gatanu cy’iryo Torero ryahawe izina ry’Indangamirwa. Iki cyiciro kitabiriwe n’abasore n’inkumi 258 baba mu bihugu 18 hirya no hino ku isi.

Mu byumweru bibiri bazamara mu ishuli rya Gisirikare i Gako bazahabwa ibiganiro bibafasha kumva neza indagagaciro na kirazira zo mu muco nyarwanda.

Iri torero ritegurwa na ministeri y’ububanyi n’amahanga ku bufatanye na minisiteri y’uburezi, iy’urubyiruko, iy’ingabo ndetse n’itorero ry’igihugu.

Egide Kayiranga