Iri tsinda ryashimye imikorere ya Radio Izuba nka radio y’abaturage, bavuga ko bishimiye uburyo abaturage bavuga amakuru binyuze mu cyitwa imboni za Radio Izuba.

Minisitiri Ragab ahamya ko bigiye byinshi kuri Radio Izuba mu birebana no guha abaturage ijambo ngo bagire uruhare mu kwiteza imbere babikesha umuyoboro w’itangazamakuru.

Uyu muyobozi wo muri Soudan anavuga ko biyemeje kujya gukangurira itangazamakuru ryo muri Soudan kwitabira gukora ibiganiro bishimangira kurwanya amakimbirane ariko bimakaza amahoro arambye mu gihugu cyabo cyaranzwe n’intambara.

Kimwe mucyo bavuze radio z’abaturage zitandukaniyeho n’izo mu Rwanda, nuko ngo iwabo muri Soudan usanga radio y’abaturage iba ari iy’ubwoko (agace kamwe gatuyemo ubwo bwoko) bumwe gusa bakaba bashima ko mu Rwanda iba idashingiye ku gace cyangwa ubwoko bumwe.

Urubuga rwa Radio izuba ruvuga ko umuyobozi wa Radio Izuba, Kayihura Eric, yavuze ko uyu mu ministire n’abo bazanye biyemeje gushyiraho uburyo bw’imboni mu maradiyo y’abaturage akorera muri Soudan.

Imboni za radio Izuba ni uburyo umuturage umwe mu murenge cyangwa mu karere ahabwa amahugurwa y’ibanze mu itangazamakuru kugirango ajye atangaza ibyabereye mu murenge atuyemo.

Mu gihe cy’amakuru izi mboni zihabwa umwanya maze zikoresheje telefoni zikavuga inkuru yabaye iwabo mu karere cyangwa mu murenge, ibi bigatuma abaturage barushaho kwiyumvamo ko radiyo ari iy’abaturage.

Radiyo Izuba ni Radio ivugira mu karere ka Ngoma mu ntara y’ Iburasirazuba ikaba ari radiyo yigenga y’ishyirahamwe ryitwa ADECO.

Jean Claude Gakwaya