Abaturage batandukanye na bimwe mu bitangazamakuru bagiye bakoresha ijambo "impunzi" ku Banyarwanda batahutse bava Tanzaniya mu rwego rwo kumvikanisha ko baje mu buryo batifuzaga. Iryo jambo ryakomeje gukwirakwira ariko ku bavugwaga ntibibashimishe.

Mu rwego rwo gukomeza kubaha ikaze nyuma yo gutangira gutuzwa mu turere dutandukanye, bigaragara ko nta mpamvu yo kubafata nk’impunzi kuko bafite uburenganzira ku Bunyarwanda, nk’uko bitangazwa na Jean Claude Rwahama, ushinzwe ibibazo by’impunzi muri MIDIMAR.

Agira ati "Impunzi ni abantu bahungira mu Rwanda kubera impamvu zitandukanye ariko cyane cyane kubera ibibazo by’umutekano wabo uba wahungabanye, abo ni impunzi, ni abanyamahanga baka ubuhungiro mu gihugu cyacu."

Yakomeje avuga ko abantu babyitiranya n’uburyo batahutsemo butari bwiza, ariko akongeraho ko ntacyo bihindura kuba ari abavandimwe b’Abanyarwanda.

Iki kibazo ntikireba abavuye Tanzaniya gusa n’undi Munyarwanda wese utahutse mu gihugu ntiyitwa impunzi. Kugeza ubu Abanyarwanda bava muri Repubulika iharanira Demokarasi ya Congo batahuka ku bushake n’abirukanywe Tanzaniya nibo bakunzwe kwitwa impunzi kandi ari Abanyarwanda bagarutse mu gihugu cyabo.

Muri urwo rwego MIDIMAR ifatanyije n’umuryango mpuzamahanga w’abimukira (IOM), bateguye amahugurwa yagenewe abakozi bashinzwe gukemura ibibazo by’abaturage mu turere twose tw’igihugu, mu rwego rwo kubasobanurira uko bakwiye kwakira aba Banyarwanda.

Aya mahugurwa y’iminsi ibiri ytangiye kuri uyu wa gatatu tariki 19/02/2014 agamije kunoza imikoranire y’inzego mu gusubiza mu buzima busanzwe abatahutse, ingorane n’imbagamizi zihari.

Emmanuel N. Hitimana