Abanyarwanda barakomeye kandi bameze neza kurusha uko byari bimeze mbere - Perezida Kagame

Perezida wa Repubulika y’u Rwanda akaba n’umukandida wa FPR-Inkotanyi ku mwanya w’Umukuru w’Igihugu, Paul Kagame avuga ko uyu munsi Abanyarwanda bakomeye kandi bameze neza kurusha uko byari bimeze mbere.

Perezida Kagame avuga ko Abanyarwanda uyu munsi bameze neza kurusha mbere
Perezida Kagame avuga ko Abanyarwanda uyu munsi bameze neza kurusha mbere

Yabigarutseho kuri uyu wa Kane tariki 04 Nyakanga 2024, ubwo u Rwanda rwizihizaga isabukura ya 30 yo kwibohora mu birori byabereye i Kigali kuri Stade Amahoro, bikabimburirwa n’akarasisi ka gisirikare kanogeye ijisho.

Kwizihiza ukwibohora ku nshuro ya 30 kuba ari ukwibuka inzira Abanyarwanda banyuzemo kugira ngo bibohore bafatanyije n’ingabo zahoze ari iza RPA zari ziyobowe na Paul Kagame, bikaba no kuzirikana abitanze n’abamugariye ku rugamba kugira ngo babohore u Rwanda, hamwe no kuzirikana ibyagezweho mu myaka ishize, niho Perezida Kagame yahereye avuga ko uyu munsi Abanyarwanda bakomeye kandi bameze neza kurusha uko byari bimeze.

Perezida Kagame yashimye Ingabo zari iza RPA mu kubohora u Rwanda
Perezida Kagame yashimye Ingabo zari iza RPA mu kubohora u Rwanda

Mu ijambo rye Perezida Kagame yashimiye inshuti z’Abanyarwanda zifatanyije n’u Rwanda kwizihiza isabukuru y’imyaka 30 yo kwibohora, avuga ko u Rwanda ndetse n’Abanyarwanda bakomeye kandi bameze neza kurusha uko byari bimeze mbere.

Yagize ati “Uyu munsi twasoje igihe cy’icyunamo twizihiza kwibohora kw’Igihugu cyacu, ndashaka gushimira abashyitsi bacu n’inshuti zacu zaje kwifatanya natwe kuri uyu munsi. Abanyarwanda uyu munsi bameze neza kandi barakomeye kurusha uko byari bimeze mbere, turakomeza kujya imbere nk’abagabo n’abagore bo mu nzego zishinzwe umutekano bamaze kudukorera akarasisi.”

Arongera ati “Iyi nyubako turimo yari inkambi ku mpuzi zayihungiragamo ziturutse mu bice bitandukanye biyikikije, Abanyarwanda bahaje bahaboneye ubuhongiro abenshi baratabarwa, turashima ingabo zahoze ari iza RPA kuko n’igikorwa zakoze n’ahandi mu bice bitandukanye by’Igihugu, tariki 04 Nyakanga turashima ababohoye u Rwanda ndetse n’abatanze ubuzima bwabo. Ingabo zacu ndetse n’inzego z’umutekano n’ikimenyetso gikomeye cy’ubumwe n’umutekano.”

Kwizihiza kwibohora ku nshuro ya 30, kuba bifatwa nko guharanira kuzirikana ko icyari cyaraboshye Abayarwanda kitazongera kubaho ukundi, niho Abanyarwanda bahera bavuga ko bagomba guharanira ubumwe bwabo ndetse no kugira uruhare mu bikorwa by’iterambere.

Umwe muri bo ati “Bavugaga ko ari inyenzi, tuje kubona tubona ko ari abantu, ngo bafite imirizo ariko ntayo twigeze tubona, niba warararaga utaryamye ukarara uhagaze, uyu munsi ukaba uryamye ugasinzira ari nta kibazo, ntacyo wikanga, hari ikiruta ibyo ngibyo?.”

Umukuru w’Igihugu yibukije abakiri bato ko ari bo bagomba gufata iya mbere mu rugamba rwo guteza imbere Igihugu no kugera ku ntego cyihaye.

Kureba andi mafoto menshi, kanda HANO

Reba ibindi muri izi Videwo:

Amafoto na Videwo : Eric Ruzindana & George Salomo

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka