Kuri iyi nshuro haje abagabo benshi ugereranyije n’izindi nshuro, bamwe bakaba batangarije Kigali Today ko batashye nyuma yo kubitegura kuko babanje kohereza imiryango yabo ikagera mu Rwanda none ikaba yarabatumyeho ko ari amahoro nabo bataha.

Babajijwe ku kibazo cyo kuba baje mbere y’italiki ya 30/06/2013 yo guca ubuhunzi, benshi mu mpunzi batangarije Kigali today ko uretse kubyumva batigeze bashishikarizwa gutaha, cyakora ngo nk’abari Karehe bashaka gutaha ari benshi kandi abakozi b’umuryango utabara imbabare Croix-Rouge urimo kubashishikariza.

Havugimana Joseph wo mu karere ka Rubavu avuga ko yatinze gutaha kubera amakuru bahabwa n’Abanyecongo bafite imiryango mu Rwanda, iyo bagarutse muri Congo bazana amakuru abakura umutima ariko ngo aho batangiye gukoresha amaterefoni bakavugana n’abari mu Rwanda, ngo Abanyarwanda bose bazatahuka.

Havugimana avuga ko nubwo muri Congo hari ibiryo, ngo yishimiye kugera mu Rwanda aho azajya aryama agasinzira adaterwa intugunda n’Abanyecongo bitwaza intwaro.

Benshi mu Banyarwanda batashye kuri uyu wa gatanu baturutse mu gace ka Karehe, na Matongo, bakavuga ko bahasize n’abandi bashaka gutaha kubera kurambirwa umutekano mucye ubarirwa mu burasirazuba bwa Congo.

Bamwe mu gabore bahetse abana babajijwe aho abagabo babo bari batangaza ko bari bafite abagabo b’Abanyecongo kandi banze ko batahana kandi ngo babafata nabi bahitamo kwigarukira mu gihugu cyabo, cyane ko n’ubusanzwe abandi Bakongomani babacyurira ko ari Abanyarwanda.

Sylidio Sebuharara