Umuryango wagejeje igihugu ku iterambere rigaragarira buri wese, bigaragarira n’amahanga abibona, nk’uko Visi Perezida w’umuryango RPF-Inkotanyi, Christophe Bazivamo yabivuze, mu birori byo kwizihiza isabukuru y’imyaka 25 ya RPF-Inkotanyi mu karere ka Kicukiro, kuri uyu wa Gatandatu tariki 17/11/2012.

Christophe Bazivamo, umwe mu bagize inteko ishinga amategeko y’umuryango wa Afurika y”Iburasirazuba, yagize ati:” No hanze barashima u Rwanda kuba rumaze kugera ku iterambere, ariko hakaba n’abandi bavuga ko ari urumamo”.

Yasabye abanyamuryango b’akarere ka Kicukiro guharanira ko amakuru meza avugwa ku Rwanda, bagakomeza kwibungabungira umutekano bafite kandi ntibawupfushe ubusa ngo habure ibikorwa by’iterambere.

Kudasubira inyuma biri mu nkingi z’umuryango wa RPF-Inkotanyi, nk’uko Komiseri ushinzwe ubukangurambaga, Protais Musoni, yabisobanuye ubwo yigishaga amateka ya RPF avuga ko biri no mu gisobanuro cy’ijambo “Inkotanyi.”

Akarere ka Kicukiro niko kaje ku mwanya wa mbere, mu ishyirwa mu bikorwa ry’imihigo y’uturere twose tugize igihugu, mu mwaka ushize wa 2011-2012.

Uhagarariye RPF-Inkotanyi mu karere ka Kicukiro, akaba n’Umuyobozi wako, Paul Jules Ndamage, yavuze ko akarere gafite amashanyarazi mu mirenge yose ikagize, kakaba gakataje mu bwubatsi bw’ibikorwaremezo birimo imihanda n’inyubako zigezweho.

Ndamage yavuze ko bishimira kuba Kicukiro irimo za kaminuza zirenga eshanu, amashuri yisumbuye agera kuri 36, hamwe n’amahoteli menshi.

Akarere ka Kicukiro karateganya guteza imbere imirimo idashingiye ku buhinzi n’ubworozi, no gukomeza kongera ibikorwaremezo hakurikijwe igishushanyombonera cya buri murenge, nk’uko Mayor Ndamage yakomeje asobanura.

Muri iki gihe Umuryango RPF-Inkoranyi umaze wizihiza isabukuru y’imyaka 25 umaze, haragaragazwa ibikorwa byagezweho. Haranateganywa imurikabikorwa n’imurikagurisha rizabera ku rwego rw’igihugu i Gikondo, guhera tariki ya 30 z’uku kwezi k’ugushyingo 2012.

Simon Kamuzinzi