Abanyamuryango b’umuryango RPF-Inkotanyi bakora muri RAB bakoze mu bushobozi bwabo maze babasha kugurira izi mpunzi imyenda y’ibyiciro bitandukanye (abagore, abagabo n’abana), ndetse banazigenera amata y’ifu yo kubafasha mu kunoza imirire, byose bifite agaciro ka miliyoni z’irindwi z’amanyarwanda.

Uru ruzinduko rwabaye tariki 16/11/2012 ngo rwari mu rwego rwo gufata mu mugongo impunzi z’Abanyekongo zahunze imirwano iri mu gihugu cya Repubulika Iharanira Demokarasi ya Kongo (RDC), ndetse no kubereka ko bifatanyije nabo mu buzima babayeho nk’uko, Ngabonziza Prime, umuyobozi w’umuryango RPF-Inkotanyi muri RAB yabisobanuye.

Yasobanuye ko benshi mu banyamuryango ba RPF-Inkotanyi baciye mu bibazo by’ubuhunzi abandi bakagerwaho n’ingaruka zabyo, bityo bakaba bumva neza ubuzima izi mpunzi zibayeho.

Iki gikorwa cyo gusura izi mpunzi kije mu gihe hizihizwa isabukuru y’imyaka 25 umuryango RPF-Inkotanyi umaze ushinzwe, ukaba ariwo wakuye u Rwanda mu bihe bibi ndetse ukanacyura impunzi zari ziri muri RDC, mu mahame ugenderaho hakaba harimo no kurwanya igitera ubuhunzi.

Umuyobozi mukuru wungirije ushinzwe ubworozi muri RAB, Dr Kanyandekwe Christine yashimiye izi mpunzi uburyo zitwara mu buzima bwazo bwa buri munsi n’ubwo bugoye.

Yababwiye ko igihe kizagera ibintu bigasubira mu buryo mu gihugu cyababyaye maze bagataha ariko ko mu gihe bakiri mu Rwanda bazababa hafi kandi ko RAB izagaruka kubasura.

Izi mpunzi zishimira Leta y’u Rwanda ndetse n’umuryango wa FPR-Inkotanyi ngo kuko batahwemye kubaba hafi no kubatera inkunga z’uburyo bwose bushoboka.

Kuva izi mpunzi zagera muri iyi nkambi ngo ni ubwa mbere zari zisuwe n’itsinda ry’abantu benshi kandi bafite n’amateka agira aho ahuriye n’ayazo, bikaba ari ibintu byo kwishimira nk’uko perezida w’izi mpunzi, Karembera Benjamin, yabishyize ahagaragara.

Izi mpunzi kandi ngo n’ubwo zidafite ubutaka bunini zakoreraho imirimo y’ubuhinzi n’ubworozi, zasabye ko niba bishoboka RAB yaziha inkwavu ndetse n’ibiti by’imbuto ngo kuko aribyo zabasha gucunga.

Emmanuel Nshimiyimana