Urwego rwihariye rwa FPR-Inkotanyi rwashinzwe muri iyi kaminuza rugizwe n’abarimu, abakozi ndetse n’abanyeshuri bo muri iyi kaminuza bari basanzwe ari abanyamuryango ba FPR-Inkotanyi, ariko nk’abantu baturuka impande zitandukanye bakaba batari bafite urwego rubahuza nk’abanyamuryango b’iri shyaka.

Ubuyobozi bw’Umuryango wa FPR-Inkotanyi mu karere ka Nyamasheke butangaza ko kuba abanyamuryango ba FPR babarizwa ahantu hatandukanye bashyiraho uburyo bufatika bwo gukoreramo bizajya bibafasha gukora igenamigambi ribashoboza kubahiriza amahame y’umuryango wa FPR-Inkotanyi.

Gushinga Urwego rwihariye (Cellule Specialisé) rw’Umuryango wa FPR-Inkotanyi muri Kaminuza ya Kibogora yo mu karere ka Nyamasheke biri mu murongo mugari FPR yihaye wo kugira ngo ibikorwa byayo byihute, bityo kugira ngo bigerweho bikaba bisaba abanyamuryango benshi kandi bafite imikorere ihamye, nk’uko byemezwa n’ubuyobozi bw’uyu muryango mu karere ka Nyamasheke.

Umukuru w’Umuryango wa FPR-Inkotanyi mu karere ka Nyamasheke, Habyarimana Jean Baptiste avuga ko abanyamuryango ba FPR bo muri Kaminuza ya Kibogora bari basanzwe bakora ibikorwa bigira impinduka nziza mu buzima bw’abaturage nk’abanyamuryango muri rusange ariko noneho bikaba bigiye kuba umwihariko kuko babonye urubuga rugaragara rwo gukoreramo.

Nyuma yo gushyiraho urwego rwihariye rw’Umuryango wa FPR-Inkotanyi muri Kaminuza ya Kibogora hanatowe inzego zihagarariye uru rwego rwihariye rwa FPR, rugizwe na Komite nyobozi irimo Perezida, Visi Perezida ndetse n’Umunyamabanga. Hatowe kandi Komite ngengamyitwarire igizwe n’abantu 5.

Uru rwego rwihariye rw’abanyamuryango ba FPR bo muri Kaminuza ya Kibogora ruzafasha aba banyamuryango kunoza igenamigambi kandi bagakorera ku cyerekezo nk’itsinda riri hamwe kandi rigomba kugira ibikorwa bifatika rigaragaza.

Emmanuel Ntivuguruzwa