Nyuma yo kumenyesha Abanyamabanga Nshingwabikorwa b’Utugari ko bahinduriwe aho bakorera kuri uyu wa 15/09/2015, umuyobozi w’Akarere ka Gakenke Nzamwita Deogratias yabasabye kugenda bagakora imirimo yabo neza baharanira kurushaho gutanga umusaruro.

Umuyobozi w’Akarere ka Gakenke yababwiye ko bidatinze bagomba kuba bageze mu tugari twabo, ku buryo bitagomba kurenga icyumweru kimwe batari bahagera kandi ko nta kibazo abona mu guhinduranya abayobozi b’Utugari kuko bapiganirwa imyanya batari bazi aho bazajya.

Abanyamabanga Nshingwabikorwa b’Utugari basanga impinduka ntacyo zitwaye kuko akazi bari basanzwe bakora katahindutse kuko ariko bazakora n’ubundi ku buryo nibyo batakoraga neza aho bari basanzwe bakorera bazabishira mu bikorwa aho bagiye kugira ngo barusheho kubahiriza inshingano zabo z’ubuyobozi.

Habumugaba Leopord yari Umunyamabanga Nshingwabikorwa w’Akagari ka Nkomane mu murenge wa Mugunga akaba yahinduriwe mu murenge wa Busengo mu kagari ka Birambo, avuga ko abona nta kibazo gihambaye gihari kuko nta gihindutse mu nshingano zabo kandi ibyo bari basanzwe bakora babizi.

Ati “Buriya no gukora ahantu igihe kirekire jyewe mbona atari byiza cyane, gusa icyo tugamije ni ukugira ngo dukomeze dutsinde imihigo kandi dukomeze dutoze n’abaturage kugera ku iterambere rirambye, burya iyo umuntu akiri mushya nibwo yagombye no kwitanga akihagera ahantu kugira ngo akomezanye ibakwe. Uramutse ubikoze ndumva nta kibazo kizananirana”.

Ureste Abanyamabanga Nshingwabikorwa b’utugari bahinduriwe utugari bakoreragamo, hari n’abakozi b’Imirenge bashinzwe imibereho myiza y’abaturage bahinduriwe aho bazajya bakorera kimwe n’abakozi bashinzwe uburezi mu mirenge. Izi mpinduka zikaba zije nyuma yaho mu cyumweru gishize Abanyamabanga Nshingwabikorwa b’Imirenge 14 mu mirenge 19 igize Akarere ka Gakenke nabo bari bimuriwe mu yindi mirenge.

Abdul Tarib