Rukimirana Jean de Dieu avuga ko kwibuka intwali bitera imbaraga n’abandi Banyarwanda bityo nabo bagaharanira gukora nk’ibyo izo ntwali zakoze igihe zari zikiriho.

Agira ati “Kwibuka intwali bishishikariza n’abandi bakiriho kuba bakora neza bagakora ndetse n’ibifitiye inyungu abaturage kugira ngo nabo bazabarwe mu ntwali.”

Ntawukigiruwe Suzane we avuga ko ari ngombwa kwibuka intwali kuko ari zo zatumye u Rwanda rwiyubaka rukaba rugeze ku iterambere.

Agira ati “Intwali tugomba kuzibuka kubera ko kugira ngo ubu tube tubaye Abanyarwanda buzuye ni uko ari ziriya ntwali zaturwaniriye zigatuma tugera kuri uru rwego tugezeho.”

Ruhumuriza Jean de Dieu we agira ati “Kwibuka Intwali bidusigira mu mitima yacu, tukazibonamo nk’Intwali zacu zagiye zikamena amaraso bari kubohora u Rwanda, ndetse tuzahore tubibuka igihe cyose.”

Mu mwaka wa 2014 umunsi w’Intwali wahujwe na gahunda ya “Ndi Umunyarwanda” nk’uko insanganyamatsiko ibisobanura: “Ndi Umunyarwanda inkingi y’ubutwali.”

Abanyaburera batandukanye bahamya ko “Ndi Umunyarwanda” ifitanye isano n’ubutwali ngo kuko nta Munyarwanda waba intwali kandi adaharanira inyungu rusange z’Abanyarwanda aho bava baagera.

Intwari zibukwa mu Rwanda ku munsi w’Intwali ziri mu byiciro bitatu aribyo Imanzi, Imena n’Ingenzi.

Norbert Niyizurugero