Ubwo bageraga mu Rwanda batangaje ko bashimishijwe no kongera gukandagira ku butaka bw’igihu cyabo bavuga ko babajwe na bagenzi babo bagisiragira mu mashyamba ya Congo.

Kuba abasirikare bo mu mutwe wa FDLR bakomeje gutahuka ngo biterwa nuko barambiwe politiki ishaje y’uwo mutwe kuko ngo ibyo babwibwa n’abayobozi babo basanga bishingiye ku binyoma gusa; nk’uko byatangajwe na 1er sergent Murwanashyaka Felix uturutse muri zone ya Warungu.

Ngo nta n’umwe mu basirikare bato ba FDLR ukigira n’umwenda wo kwambara mu gihe abayobozi babo bibera mu bucuruzi bubafitiye inyungu mu gihugu cya Congo.

1er sergent Havugimana we atangaza ko ngo yumva yikije umutima mu nda kubona ataraguye mu mashyamba ya Congo kubera intambara za buri munsi kuko ngo badasiba kurwana n’imitwe yitwaje intwaro cyane cyane uwitwa Raiya Mutomboki. Nawe yashishikarije bagenzi be kudatsimbarara ku binyoma by’abayobozi ba FDLR kuko ntacyo iteze kubagezaho.

Aba basirikare hafi ya bose bavuga ko baraye mu mutekano udasanzwe mu nkambi ya Nyagatare kuko ngo aho babaga mu mashyamba ya Congo bararaga bikanga batewe bitewe nuko intambara zo muri icyo gihugu zitarangira.

Bimwe mub yatumaga badataha ngo akenshi nuko bahabwaga amakuru ababwira ko bafatwa nabi iyo bageze mu Rwanda ari ko ngo barabaririje neza basanga ari ukubeshya akaba ariyo mpamvu bakomeje gutahuka.

Aba abasirikare bane basanze abandi batanu bamaze iminsi iminsi itatu batahutse bacumbikiwe mu nkambi ya Nyagatare kandi muri bo harimo abazanye n’abagore babo.

Musabwa Euphrem