Perezida Kagame yabasobanuriye uruhare rw’u Rwanda mu miyoborere y’abatuye akarere ruherereyemo, gushakira amahoro igihugu cya Congo, guhuriza hamwe no guteza imbere ibihugu bigize umuryango w’Afurika y’uburasirazuba (EAC); nk’uko Umunyamaganga uhoraho muri Ministeri y’ububanyi n’amahanga, Marry Baine yatangaje.

Ati: “Bashishikajwe no kumva igihugu nk’u Rwanda kigeze ku ntambwe yo kubanisha neza abagituye bose nyuma y’imyaka 19 kibayemo Jenoside, hamwe no guharanira kwikemurira ibibazo nk’inkiko Gacaca na gahunda zinyuranye zigamije kurwanya ubukene.”

Prof. James Fearon uyoboye abo banyeshuri yavuze ko bakuye isomo mu Rwanda ryo kugira gahunda zihariye z’intangarugero ku bindi bihugu, nko kuba rwarihaye icyerekezo 2020 gikubiyemo intego zo kuzamura ubukungu n’imiyoborere myiza, kandi byose bishingiye ku ikoranabuhanga.

Itsinda riyobowe na Fearon ry’abantu 20, rizasura uduce dutandukanye tw’u Rwanda kuva tariki 24-30/03/2013, harimo kuganira n’abayobozi ba MINAFFET, RDB, MINISANTE, no gusura urwibutso rwa Jenoside rwa Kigali, Komisiyo yo gusubiza mu buzima busanzwe abahoze ku rugerero, na sosiyete ya Crystal Ventures.

Ngo barateganya no gusura ikigo cy’Ubwongereza gishinzwe iterambere DFID, Ambasade ya Leta zunze ubumwe za Amerika, Kaminuza y’u Rwanda, Ikigo gishinzwe ubucuruzi bw’amakawa, Bralirwa, inkambi y’impunzi y’agateganyo ya Nkamira, ibitaro bya Kirehe hamwe n’ikigo Agahozo Shalom cy’i Rwamagana.

Uru rugendo rwo gusura u Rwanda ngo rufite akamaro ko kuzajya kugaragaza isura yarwo muri Amerika n’ahandi mu bihugu bakomokamo byo ku isi, aho baba banagamije gukora raporo ijya mu nteganyanyigisho zo mu mashuri, nk’uko abahagarariye abo banyeshuri basobanuye.

Perezida Kagame yakiriye itsinda ry’abiga politiki z’amahanga muri Stanford University kuri uyu wa gatatu tariki 27/03/2013, nyuma yo kwakira abiga muri iryo shuri ibijyanye n’ubukungu ku munsi wabanje.

Simon Kamuzinzi