Mu nama ya 24 yahuje abaminisitiri bashinzwe ububanyi n’amahanga mu bihugu bigize CEPGL taliki ya 14/2/2014, abaminisitiri bagaragaje ko uyu muryango ufite uruhare mu iterambere ry’ibihugu biwugize kuko bihuje amateka, umuco n’ibibazo byaranze akarere kandi bafatanyije bashobora kubivamo, bemerera CEPGL kuzakoresha ingengo y’imari igera kuri 2,645,355 z’amayero muri 2014.

Muri iyi nama abaminisitiri basabye ko imigabane bashyira muri CEPGL yatangirwa ku gihe kugira ngo byorohereze uyu muryango kugera ku ntego wihaye zishingiye ku mahoro, umutekano n’imiyoborere myiza, kwita ku guteza imbere ubuhahirane n’ubucuruzi bwambukiranya imipaka, kongera ibikorwa remezo birimo ingufu z’amashanyarazi, itumanaho hamwe no kongera ibiribwa.

Minisitiri Louise Mushikiwabo ushinzwe ububanyi n’amahanga mu Rwanda avuga ko umwaka wa 2014 ugomba kujyana n’impinduka n’ivugurura mu bikorwa, kugira ngo akarere gashobore gucyemura ibibazo by’imibereho y’abagatuye, ndetse ubuhahirane bwiyongere hubakwa ibikorwa remezo, hongerwa ubushakashatsi mu kongera umusaruro.

Umuryango wa CEPGL wakunze kubangamirwa n’intambara ziterwa n’imitwe yitwaza intwaro mu gihugu cya Repubulika iharanira demokarasi ya Congo hakaba n’urwicyekwe mu bihugu bihuriye muri CEPGL, abaminisitiri bemeranyije ko bagiye gufatanya mu bikorwa bizamura imibereho y’abaturage.

Tunda ya Kasende wungirije Minisitiri w’ububanyi n’amahanga wa Congo avuga ko imitwe yatangiye kurwanywa, nyuma ya M23, ubu hari gukurwaho umutwe wa ADF wo mu gihugu cya Uganda kandi hazakurikiraho umutwe wa FDLR kugira ibihugu bishobore gukorera mu mucyo.

Muri iyi nama hemejwe igenabikorwa zigenderwaho na CEPGL kuva muri 2013-2020, gushyigikira ibikorwa byo kubaka urugomero rwa Ruzizi III ruzajya rutanga amashanyarazi, hamwe no gufasha indi mishinga ya CEPGL nka IRAZ, EGL na BDEGL gukora neza, hemezwa ko abaminisitiri b’imari n’ingufu bahura kugira ngo haganirwe ku kibazo cy’imyenda y’amashanyarazi ya SINELAC utarishyuwe.

Abaminisitiri b’ububanyi n’amahanga muri CEPGL banasabye ko hafatwa ingamba zo kurwanya isuri n’imyanda ijya mu kiyaga cya Kivu n’umugezi wa Rusizi mu kubungabunga ibidukikije , hasabwa ko u Rwanda na Congo mu gihe cyihuse haba kwimura abaturage baturiye ahazubakwa urugomero rwa Ruzizi III.

Abaminisitiri b’ububanyi n’amahanga mu bihugu bigize CEPGL basanga imishinga ya CEPGL yakomeza gukora ndetse ibihugu bigatanga umugabane w’amadollars ibihumbi 600 mu mushinga wa IRAZ, no gukomeza gufasha banki ya CEPGL gukomeza ibikorwa nyuma y’igihe kinini idakora.

Mu igenamigambi ry’umuryango wa CEPGL, hagaragazwa imishinga 57 igomba gutezwa imbere harimo 7 irebana n’amahoro, umutekano n’imiyoborere myiza, 9 yateza imbere akarere mu buhahirane n’ubucuruzi, 30 y’ibikorwa remezo nk’imihanda, ingufu z’amashanyarazi n’ikoranabuhanga, 11 ikibanda ku buhinzi no kongera ibiribwa.
Ingengo y’imari iteganywa gukoresha kuva 2014-2020 igera kuri miliyari 6 z’amayero.

Minisitiri Mushikiwabo yifatanyije n’Abarundi bahuye n’ibiza

Nyuma y’imvura idasanzwe yaguye mu mujyi wa Bujumbura igahitana abaturage bagera 67, hagakomereka 80 naho abagera ku bihumbi 12 bakava mu byabo, abaminisitiri b’ububanyi n’amahanga bo muri CEPGL bifatanyije n’abahuye n’icyo kiza.

Nyuma yo gusura abaturage bashyizwe mu nkambi muri Komini Kinama muri Bujumbura, ahasenyutse inyubako zituwemo n’abantu n’amashuri abana bigiragamo, Minisitiri Mushikiwabo yatangaje ko u Rwanda rusanzwe rufatikanya n’Abarundi mu gucyemura ibibazo kandi n’ubu rutazabatererana.

Sylidio Sebuharara