Minisitiri Murekezi yasabye abakozi kwisuzuma bakareba amasaha bakora ku munsi niba atanga akahe gaciro hanyuma bakabigereranya n’umushara babona ku kwezi.

Aha yavuze ko hari abakozi bahembwa kandi baba batatanze umusaruro basabwa; abo yabasabye kuva mubyo barimo kuko ntawakwifuza gusubiza u Rwanda inyuma ukurikije n’intambwe igihugu kimaze gutera.

Minisitiri w’abakozi yabwiye abakozi bo mu karere ka Rusizi ko ibikorwa bya buri wese bigomba kujyana n’imihigo yiyemeje ndetse asaba abayobozi ko mu gihe cyo gusuzuma abakozi bagomba kujya batanga amanota bahereye ku mihigo yahize n’uko yaba yarayesheje.

Ayo manota kandi ngo niyo azajya agenderwaho mu gukura umukozi ku kazi cyangwa kukagumaho akaba yazamurwa mu ntera. Aha kandi Minisitiri w’abakozi yatangaje ko hakwiye kubaho gahunda yo kujya bashimira abakozi bitwaye neza mu kazi naho abatatanze umusaruro wifuzwa bibaturutseho bakabihanirwa.

Icyakora nubwo ngo ayo manota atangwa rimwe na rimwe ngo hari ahakoreshwa ikimenyane gishingiye ku bucuti n’ibindi bityo umukozi akaba yahabwa amanota adahwanye n’umusaruro yatanze ndetse ugasanga ababashije kuzuza inshingano zabo batayabonye bikaba byabaviramo kwirukanywa mu kazi.

Minisitiri w’abakozi yatangaje ko umukozi ariwe wenyine ugomba kumenya ko yarenganye akabigaragaza kare kuko iyo byamaze kugera kure amanota ye atagaragara bituma atazamuka mu ntera ndetse uko iminsi igenda babona ayo manota atagaragara akirukanywa mu kazi.

Minisitiri Murekezi yasobanuye ko niba gutanga akazi bidakurikije amategeko bikiriho nk’uko bivugwa byaba ari akarengane maze yiyama abakoresha ibizamini kuvutsa abatsinze uburenganzira bwabo kuko ibyo bifatwa kimwe na ruswa bikamunga igihugu.

Aha kandi minisitiri w’abakozi yasabye abakozi kujya bamenyereza umukozi winjiye mu kazi gukora akazi yinjiyemo neza bakamumenyereza kugeza ubwo nawe azaba ageze ku rwego rwo gutanga umusaruro ushimishije.

Ngo hari abakozi batereranywa mu kazi bagezemo bwa mbere aho bibasaba ko bagomba kukimenyereza bonyine, Minisitiri yavuze ko ibyo bidakwiriye na gato kuko ntawe ujya mu kazi akazi neza.

Musabwa Euphrem