Abo bajyanama bavuga ko bidakwiye ko umukozi yajya ahabwa amafaranga yo gukoresha mu rugendo (frais de mission) yaruvuyemo kandi ari yo yagakoresheje mu byo aba yagiyemo.

Umwe mubajyanama yagize ati “Twifuza ko twajya tubona amafaranga atugenewe mbere y’uko igikorwa gikorwa, abajya mu butumwa bw’akazi bakayitwaza kuko n’ahandi mu tundi turere birakorwa”.

Ubuyobozi bw’Akarere ka Nyamasheke buvuga ko byajyaga bibaho ko abakozi bahabwa amafaranga mbere ariko baza gusanga hari abatazana raporo yavuye mu kazi bagiyemo bituma ubu buryo babukuraho umukozi akabona amafaranga ari uko amaze kwerekana ibyangomba byerekana ko koko yavuye mu butumwa bw’akazi.

Umunyamabanga Nshingwabikorwa w’Akarere ka Nyamasheke, Habiyaremye Pierre Celestin, agira ati “Twasanze ibyiza ari uko abakozi b’akarere bajya bahabwa amafaranga nyuma yo kuva mu butumwa kuko hari abatarazanaga ibyangombwa (supporting documents) byerekana icyo ayo mafaranga yakoreshejwe bikadutera ikibazo”.

Perezida wa Njyanama y’Akarere ka Nyamasheke, Dr Ndabamenye Telesphore, avuga ko bikwiye gukosoka umukozi udatanze raporo agahabwa ibaruwa imusaba ibisobanuro ariko mu gihe umukozi agiye mu butumwa bw’akazi bwamenyeshejwe hakiri kare akabona amafaranga ye y’urugendo.

Yagize ati “Ibi bizakosoka, niba hari umukozi utatanze raporo y’ubutumwa bw’akazi yagiyemo akandikirwa agatanga ubusobanuro, ubutaha kandi bikaba byamugiraho ingaruka ariko ubundi umukozi agomba kujyana amafaranga azakoresha nyine muri ubwo butumwa aba agiyemo”.

Mu busanzwe, umukozi wo mu Karere ka Nyamasheke ahabwa amafaranga y’ubutumwa bw’akazi nyuma yo kwerekana ibyangombwa (supporting documents) zerekana ko yavuye mu butumwa bw’akazi koko, nubwo hari aho amafaranga y’ubutumwa bw’akazi abagiye bagenda bayitwaje, mu tundi turere.