Abo bakozi bo muri Ambasade ya Amerika mu Rwanda bagiranye ibiganiro n’ubuyobozi bwa Gereza ya Mpanga babagaragariza ishusho y’iyo gereza n’imibereho y’imfugwa zaho.

Nyuma y’ibyo biganiro basuye ibikorwa by’ubugeni n’ubukorikori bikorerwa muri iyo gereza ndetse n’igice gifungiyemo by’umwihariko imfungwa umunani zaturutse mu gihugu cya Sierra Leone zihafungiye.

Muri iki gice imfugwa zo muri Sierra Leone zifungiyemo beretswe aho zirara, aho zifatira amafunguro ndetse n’aho zidagadurira yaba mu mikino no gukurikarana amakuru abera hirya no hino ku isi hifashishijwe imirongo itandukanye ya za televiziyo mpuzamahanga.

Bakiri muri gereza ya Mpanga banabonanye n’izindi mfungwa zifungiye ibyaha bitandukanye bagirana ibiganiro byibanze ku mpamvu y’urwo ruzinduko bahagiriye.

Nk’uko byasobanuwe nabo bakozi b’ambassade ya Amerika mu Rwanda barimo Calorina Hidea ushinzwe ubukungu n’ubujyanama mu bya politiki yavuze ko yishimiye urugendo bagiriye muri gereza ya Mpanga.

Yabisobanuye atya: “Uruzinduko twagiriye muri gereza ya Mpanga rwatweretse ko Leta y’u Rwanda yitaye ku buzima bw’imfungwa”

Yagarutse ku mpamvu y’urwo ruzinduko asobanura ko rwari rugamije kumenya imibereho y’Abanyarwanda cyane cyane abafungiye muri iyo gereza. Calorina yatangaje ko hari byinshi bigiye muri urwo ruzinduko byababera isomo ryiza ku gihugu cyabo cy’igihangange nka Amerika.

Komiseri ushinzwe imibereho myiza mu kigo cy’igihugu gishinzwe imfungwa n’abagororwa mu Rwanda Rukundo Emmanuel wari uherekeje abo bakozi ba Ambasade ya Amerika mu Rwanda yagaragaje ko nyuma yo kwibonera imibereho myiza y’izo mfungwa za gereza ya Mpanga bishimiye uko zibayeho mu biganiro byose yagiranye nabo.

Abo bashyitsi bo batangariye amafunguro ahabwa imfungwa zo mu gihugu cya Sierra Leone bavuga ko hari n’amahoteri bitabonekamo.

Imfungwa zo muri sierra Leone zivuga ko ikibazo zihura nacyo ari icyo kuba zifungiye kure y’imiryango yabo ariko ku kibazo cy’imibereho myiza cyo nta gihari; nk’uko Issa umwe muri izo mfungwa yabitangarije abakozi ba Ambassade ya Amerika mu Rwanda ubwo bamusuraga mu cyumba cya nimero 9 abamo.

Jean Pierre Twizeyeyezu