Ibi ni ibitangazwa na bamwe muri aba bahuguwe, bavuga ko mu Rwanda hari gahunda zateye imbere mu kurinda ubwandu bw’abasirkare ariko ugasanga mu bihugu byabo zitaratera imbere, nk’uko bitangazwa na Arcade Kanjori waturutse mu gihugu cy’u Burundi.

Yagize ati “Turashima rero ko ari igihugu gikora neza n’uko uwo mugambi w’uko abasirikare bipimisha bakanakurikiranwa ku bamaze kwandura; twabonye akanya ko gusura ibitaro bya Gisirikare cya Kanombe batwereka ibikorwa bihakorerwa byo gukurikirana abarwayi ba Sida. Banatweretse gahunda yo gusiramura tubona uburyo yitabiriwe n’abantu benshi kandi tuzi uburyo bufasha abantu mu kwirinda icyorezo cya SIDA”.

Kimwe na bagenzi be bavuze ko nibasubira iwabo bazatangira gahunda yo gukwirakwiza iyi gahunda yo gusiramura abasirikare no kubasaba kwipimisha ku bushake, kuko usanga mu bihugu byabo iyi gahunda yo kurwanya SIDA ikiri inyuma.

Eugene Sangano, umuyobozi wa Drew Care International, umuryango utegamiye kuri Leta ukorana n’igisirikare cy’u Rwanda mu kucyongerera ubushobozi mu kurwanya indwara nka SIDA, yatangaje ko bifuje gusangiza ibi bihugu ubumenyi bw’u Rwanda mu gufasha ababana n’ubwandu bwa SIDA.

Ati “Ni amahugurwa twagize kugira ngo dusangire na bo ubumenyi, bafite uburyo bakoresha iwabo natwe mu Rwanda burahari, ariko ubwacu busanzwe bukora kandi bukora neza. Twashakaga rero kugira ngo tubagezeho ubwo bumenyi”.

Col. Dr. Ben Karenzi Umuyobozi w’ibitaro bya Gusurukare bya Kanombe (RMH), yatangaje ko Abanyafurika baramutse baranzwe n’umuco wo gusangizanya ubumenyi ibibazo bikunda kugaragara kuri uyu mugabane birimo indwara nka za Ebola bitagera kure cyangwa ngo byice benshi.

Yabasabye kuzasakaza ubumenyi bazakura mu Rwanda kugira ngo n’abandi babashe kumenya uko bakwirinda bakanakumira icyorezo cya SIDA n’izindi ndwara. Iyi gahunda ikaba iterwa inkunga n’igisirikare cya Amerika mu rwego rwo kurwanya indwara mu gisirikare Nyafurika.

Emmanuel N. Hitimana