Abazitabira ibi biganiro harimo umwalimu muri kaminuza akaba n’umwanditsi ukomeye w’umunyafurika Prof Wole Soyinka wahawe igihembo cya Nobel mu buvangazo mu 1986; Prof. Margee Ensign umuyobozi wa Kaminuza y’Abanyamerika iri muri Nigeriya, uwahoze yungirije umunyamabanga wa Leta y’Amerika ku mugabane w’Afurika, Dr. Jendai Frazer; Minisitiri w’Ubucuruzi muri Kenya, Moses Wetangula hamwe Dr Donald Kaberuka, umuyobozi wa Banki nyafurika.

Izi mpugucye muri politike n’abanditsi bazatanga ibitekerezo byafasha umugabane w’Afurka n’ u Rwanda mu kwiyubaka no kugana aho byifuza cyane ko hazagaragazwa inzira u Rwanda rwanyuzemo nyuma yo kubona ubwigenge no kwibohora.

U Rwanda rwagaragaje impinduka zitandukanye hagendewe ku itegeko nshinga ryashyizweho 2003 kandi u Rwanda ruzigirwaho guteza imbere uburinganire.

Iyi nama y’iminsi ibiri igamije guhurizwamo ibitekerezo bishobora kwifashishwa mu guteza imbere Afurika n’u Rwanda nyuma y’imyaka 50 y’ubwigenge n’imyaka 18 yo kwibohora; nk’uko bitangazwa n’umuyobozi w’ikigo cy’igihugu gishinzwe imiyoborere myiza, Prof. Anastase Shyaka.

Iyi nama ifite insanganyamatsiko igira iti: imyaka 50 y’ubwigenge ni irihe somo ryakurwamo, kubaka igihugu, iterambere n’ubwisanzure, kureba aho u Rwanda n’Afurika bigana mu gihe kiri imbere.

Sylidio Sebuharara