Urugendo rwabo barutangiye kuwa Gatanu tariki 6/3/2015 basura Ishuri Rikuru ry’Imyuga n’Ikoranabuhanga rya Tumba riri mu Karere ka Rulindo, bakomereza mu Karere ka Musanze basura Ikigo cy’amahugurwa cya Mutobo kigishirizwamo abitandukanyije na FDLR.

Aba bayobozi baganiriye n’abitandukanye n’uyu mutwe. Major Hategekimana valens wavuze mu izina ryabo, yabasobanuriye uburyo FDLR ihohotera Abanye-Kongo, uko bakirwa n’uburyo bafashwa gusubira mu buzima.

Prof. Dr. Walter Homolka uhagarariye inyungu z’u Rwanda mu Budage, avuga ko ibihugu byombi bisangiye amateka ya Jenoside akaba ari yo mpamvu yafashe iya mbere ngo atange umusanzu we mu kubaka igihugu.

Akomeza avuga ko azi neza ibibazo byo kongera kubaka igihugu cyanyuze mu bihe bigoye nk’intambara. Ashima gahunda yo kongera gusubiza mu buzima busanzwe abitandukanyije na FDLR ngo bishimangira intambwe igihugu cyateye mu bumwe n’ubwiyunge.

Prof. Dr. Homolka yemeza ko urugendo yakoreye mu Rwanda ari ingirakamaro ku nshingano ze kuko afite amakuru yahagahezo aho kuvuga ibyo yabwiwe.

Agira ati “Ndatekereza ko bitandukanye cyane kuba wageze hano mu gihugu, uvugana n’abantu, uvuga inkuru wahagazeho aho kuvuga gusa amakuru, ndatekereza ko ari ikintu gikomeye kugera mu Rwanda no guhura n’Abanyarwanda.”

Mu mahanga hari abantu barwanya ibyo u Rwanda rwagezeho bakwirakwiza hirya no hino amakuru y’ibinyoma, Ambasaderi w’u Rwanda mu Budage, Mukandutiye Christine, avuga ko abahagarariye inyungu z’u Rwanda mu mahanga bazagira uruhare mu kuyanyomoza bavuga amakuru bahagazeho.

Kuri uyu wa Gatandatu tariki 07/03/2015, abahagarariye inyungu z’u Rwanda mu mahanga barasura umupaka uhuza u Rwanda na Repubulika iharanira Demokarasi ya Congo n’Uruganda rw’icyayi rwa Pfunda mu Karere ka Rubavu.

NSHIMIYIMANA Leonard