Ibi babikoze mu rwego rwo gushimira izi ngabo ko umutekano n’iterambere bagezeho babikesha izi ngabo zanahaze ubuzima bwazo, nk’uko umwe muri aba bagore witwa Fortune Twizerimana yabitangarije Kigali Today kuri uyu wa gatanu tariki 26/9/2014.

Yagize ati “Tubona ko natwe kubatera inkunga ari byiza, iyi mipira twayiguze mu gikorwa cy’urukundo kuko nabo baritanze bagira urukundo natwe biba ngombwa ko tugira igitekerezo cyo kubafsha. Twarabyishimiye cyane kuko nabo bakoze igikorwa gikomeye cyo kutwitangira.”

Alfred Nkubiri ari nawe waganirije iki gitekerezo muri aba bagore, yavuze ko iki gitekerezo yumva ko buri Munyarwanda yakigiramo uruhare, ibyo bikaba ari nabyo byamuteye kuganiriza aba bagore ariko bakabikora nta gahato bibavuye ku mutima.

Ati “Iki gitekerezo ni icyacu Abanyarwanda twarakiganiriye n’aba badamu n’abandi bose bari hirya no hino ahantu nkorera, hari abari i Gikondo, Nyandungu n’Iburasirazuba mbabwira ko bagomba kugira uruhare rwabo ubishoboye atanga 500 kuzegza igihe azarangiriza.”

Aba bagore bari abashomeri ariko umugiraneza washinze uru ruganda aza kubabumbira hamwe abaha akazi akanabasobanurira ubutyo bwo kwiteza imbere, ubu bakaba bamaze kujya bigurira mitiweli bakanizigamira, nk’uko byatangajwe na Annonciata Nyiramuzima umaze imyaka ine muri aka kazi.

Aba bagore bavuga ko iyo izi ngabo zitaza kwitanga ngo zikure ubumuga ku rugamba nabo ntabwo baba bashobora kwikorera bakaniteza imbere. Iyi gahunda yo gutera ingabo mu bitugu abahoze ku rugerero imaze imisnhi, aho abantu batandukanye bafaha abamugariye ku rugamba bagura imipira yanditseho amagambo y’ubutwari. Hari imipira igura ibihumbi bitanu by’amafaranga y’u Rwanda n’indi igura amafaranga ibihumbi 10.

Emmanuel N. Htimana