Nyuma ya Jenoside yakorewe Abatutsi hagiye hagaragara ibibazo byinshi bijyanye n’ingaruka zayo, abana baburanye n’ababyeyi babo ni kimwe mu byateye intimba ababyeyi benshi ariko ugasanga iki kibazo kitaravuzweho cyane.

Berta Kamanyana, umwe mu babuze abana be mu gihe cya Jenoside kugeza ubu batatu , avuga ko ntako atagize ngo ashakishe, akaba yaranagiye gushakira i Goma ariko ntababone. Gusa ngo bimutera intimba kuba atazi niba ari bazima cyangwa barapfuye.

Ibyo biri mu byatumye Kamanyana na Beatrice Mukamurindwa bashyira hamwe igitekerezo cyo gushinga umuryango CCMES (Cri du Coeur d’une Mere qui Espere) wo gushakisha abana babuze muri ubwo buryo, mu buryo bwo kunganira izindi gahunda ziriho zo gushakisha abana bazimiye, nk’uko Kamanyana yabitangaje.

Mukamurindwa wagize iki gitekerezo avuga ko afite ubuhamya bwinshi bw’abantu babuze abana babo.

Agira ati "Twashinze uyu muryango mfite icyizere ko nshobora kuzongera nkabona abana banjye ariko niyo ntababona undi muntu akababona binyuze muri uyu muryango twashinze byanshimisha."

Mu kiganiro n’abanyamakuru kuri uyu wa gatatu tariki 16/7/2014, Beatrice Mukamurindwa, wagize iki gitekerezo kuko nawe yabuze abana batatu muri Jenoside, yatangaje ko asaba abantu bose kumva ko iki kibazo kibareba kuko hakiri abantu benshi bataraboneka.

Ati "Abantu benshi bashobora kuzibaza impamvu nagize iki gitekerezo nyuma y’imyaka 20 ariko nababwira ko cyari kikiri mu bitekerezo, ubu nibwo dutangiye. Abantu bose barakangurirwa gutangira gushakisha abo bana ku buryo niyo yabona umukuru nabyo byaba ari amahirwe ariko intego ni ugushaka abana bari bafite kuva ku mezi kugera ku myaka 17."

Mukamulindwa washinze uyu muryango avuga ko yagize iki gitekerezo ashakisha abana be batatu n’abisengeneza be babiri babuze muri icyo guhe cya Jenoside.

Kamanyana ashengurwa kuba atazi irengero ry’abana be uko ari batatu.

Mu ngendo zinyuranye yakoze abashakisha, yagiye yumva amakuru anyuranye ariko yose avuga ko abana be bari mu ngo zitandukanye haba mu Rwanda no muri Congo.

Yavuze ko yasanze abo bana ahanini barakoreshwaga imirimo itari iya bana, ndetse na Croix Rouge igatangaza ko nta bushobozi ifite bwo kubashaka muri izo ngo.

Muri icyo gihe kigera ku myaka 20 ashakisha yaje kumenya ko atari wenyine ufite icyo kibazo. Abenshi mu bo yafatanyije gushinga umuryango bavuga ko kugeza ubu umutima utarajya mu gitereko mu gihe bataramenya amakuru niba abana babo bariho cyangwa barapfuye.

Gusa ku rundi ruhande haracyari impungege za bamwe mu banyamuryango bataremera kwakira abo bana babuze, bitewe n’uko basigaranye imitungo cyangwa batizera neza ko abo bana bakiri bazima.

Emmanuel N. Hitimana