Busenge Thomas ni umusaza w’imyaka 72 utuye mu Murenge wa Mudende mu Karere ka Rubavu. Avuga ko abageze mu zabukuru bafashwa na Leta, abandi bagatungwa n’imiryango yabo, agasaba abakiri bato gutegura izabukuru zabo.

Agira ati «Twe Leta iradufasha, kandi dushaje neza ugereranyije n’abatubanjirije mu myaka yashize. Gusa turagira inama abakiri bato, kujya muri Ejo Heza, bakazigamira ahazaza habo, bakazasaza neza bishimye.»

Busenge avuga ko ugeze mu zabukuru atagomba gutegera amaboko abakiri bato, ahubwo akwiye gutungwa n’ibyo yakoze.

Ati «Kugera mu zabukuru bijyana no kuruhuka, gutungwa n’ibyo wakoze, ntibikwiye ko wanduranya ku bakiri bato na bo baba bakishakisha. Iriya gahunda ya Ejo Heza ni nziza ku barimo gusaza, abakiri bato bategure ubusaza bwabo. »

Umuyobozi Wungirije ushinzwe Imibereho myiza y’Abaturage mu Karere ka Rubavu, Ishimwe Pacifique, ubwo yari mu birori byo kwizihiza umunsi mpuzamahanga wahariwe kuzirikana abageze mu zabukuru, tariki 01 Ukwakira 2024, yavuze ko umunsi wahariwe abageze mu zabukuru ujyana no kubagezaho inkunga zibashimira ibyiza bakoze bagishoboye.

Agira ati « Kuzirikana umunsi w’abageze mu zabukuru bijyana no kubagenera inkunga, bashimirwa ibikorwa baba barakoze, kuko bageze muri ndinda mwana. Uba umwanya wo kwibutsa abakiri bato kwita ku bageze mu zabukuru kuko baba barakoze akazi kabo neza bagafashwa gusaza neza. »

Mu gihe abageze mu zabukuru bashima gahunda ya Ejo Heza nk’uburyo bwo kwiteganyiriza gusaza neza, Ishimwe Pacifique na we avuga ko iyi gahunda ari ingirakamaro kuko yashyiriweho gufasha Abanyarwanda bose kwitegura neza izabukuru, agasaba abakiri bato gushyira imbaraga mu kwizigamira.