Ikigamijwe ni ukurebera hamwe inshingano ihuriro rifite zirimo kubaka ubushobozi bw’abanyamuryango, ubufatanye n’izindi nzego, uko umutungo wakoreshejwe, gukora ubuvugizi, kubaka inzego, hamwe no gukorana n’abandi mahuriro y’abagore bari mu nteko inshingamategeko mu bindi bihugu.

Iri huriro kandi riziga ku mikoranire n’inzego z’abagore batowe bakora mu nzego z’ibanze kuko bafite uruhare mu kuvuganira abagore no guteza imbere umuryango nyarwanda by’umwihariko umugore; nk’uko byatangajwe na Mukarugema Alphonsine ukuriye FFRP.

Kubera abagore bagihura n’ibibazo by’ibushobozi buke, barasaba abagore bari mu nzego zatowe kubakorera ubuvugizi kugira ngo babone inguzanyo ndetse no gufashwa kwiga imishinga yatuma babona ibyo gukora.

Mu karere ka Rubavu abagore benshi batunzwe kwikorera imitwaro bayivana mu Rwanda bayijyana i Goma muri Repubulika Iharanira Demokarasi ya Congo. Bavuga ko bakwiye gukorerwa ubuvugizi buborohereza kujya bagendana n’abana babo kuko babasiga ku mupaka kubera amategeko atabemerera kubambukana nta byangombwa bafite.

Abagore bari mu nzego z’ubuyobozi kandi basabwa gusaba ikigega cyashyiriweho guteza imbere abagore kugera mu nzego zo hasi kugira ngo gishobore gufasha abafite imishinga mito cyane nk’abacururiza ku gataro, ndetse kigafasha abakora umwuga wo kwicuruza n’abasabiriza kubireka bakikorera.

Hon. Mukarugema Alphonsine ahakana amakuru avuga ko abadepite bo mu Rwanda batoye itegeko ryemera ikurwamo ry’inda ahubwo ko byumvikanye nabi. Ngo hariho amategeko ahana abakuramo inda uretse agace gato kemerera abantu gukuramo ariko nabwo hegendewe ku byemezwa na muganga n’inkiko.

Sylidio Sebuharara