Umuyobozi w’Akarere wungirije ushinzwe ubukungu, Kagenzi Stanislas, yatangarije abari bagize iyo komisiyo bayobowe na Hon Honorable Mukayuhi Rwaka Constance ibyagezweho mu mihigo y’Akarere ka Gicumbi y’umwaka ushize wa 2011-2012.

Ibibazo byatumye idashobora ingengo y’imari y’Akarere y’umwaka ushize idakoreshwa 100% harimo amafaranga abaterankunga bemeye ntashobore kuboneka, ba rwiyemezamirimo batinda kurangiza imirimo batsindiye bityo na bo ntibishyurirwe mu gihe cy’ikoreshwa ry’ingengo y’imari n’ibindi.

Umunyamabanga nshingwabikorwa w’umurenge wa Byumba wari watumiwe muri iyi nama na we yasobanuye ibyerekeranye n’amafaranga akoreshwa n’umurenge ayobora ndetse n’uburyo aboneka.

Yagize ati «amafaranga dukoresha akenshi aba ari inkunga itiruka mu mishinga hirya no hino, iyo atabonekeye igihe usanga ibyo tugomba gukora rimwe na rimwe bidindira cyangwa ntibikorerwe igihe bigatuma ingengo y’imari idashyirwa mu bikorwa igihe ».

Basobanuriwe kandi ku bijyanye na DDP, EDPRS (Economic Development Poverty Reduce Strategy) ya mbere n’iya kabiri, ikoreshwa ry’amafaranga ya VUP (Vision Umurenge Program) n’uburyo akoreshwa hakurikijwe uburinganire (gender), kwita ku nzego z’abagore, urubyiruko n’abafite ubumuga.

Abo badepite batanze inama ko igihe ubuyobozi bw’Akarere bwagize ibibazo bugomba kubigeza ku zindi nzego zibakuriye kugira ngo bishakirwe igisubizo ariko bitarinze kudindiza gahunda za Leta.

Ernestine Musanabera