Abo badepite basuye imidugudu y’icyitegererezo ya Nyagatovu mu karere ka Kayonza na Kitazigurwa mu ka Rwamagana, banasura ikiyaga cya Muhazi mu rwego rwo kubereka ibikorwa binyuranye biteganyijwe by’ubukerarugendo no guteza imbere ishoramari kuri icyo kiyaga, ku buryo bishobotse banazana n’abashoramari bagatangiza imishinga y’iterambere kuri icyo kiyaga.

Abo badepite basaga 25bahagarariye intara y’uburengerazuba (Trans-Zoia) mu gihugu cya Kenya basobanuriwe uburyo abaturage batujwe muri iyo midugudu yombi bari abakene, bamwe muri bo batagiraga aho begeka umusaya ndetse n’abari bahafite bakaba bari batuye mu nzu zidashobotse.

Banasobanuriwe imishinga itandukanye irimo ubworozi abo baturage begerejwe nyuma yo gutuzwa muri iyo midugudu, ndetse banirebera ibikorwaremezo birimo amashanyarazi, biyogazi, amashuri n’imihanda biri muri iyo midugudu.

Ibi ngo byatunguye abo badepite cyane kuko basanze ubuyobozi bw’u Rwanda bushishikajwe no guteza imbere imibereho y’abaturage bo hasi, ku buryo ngo babonye inkuru nziza bazasubirana iwabo nk’uko byavuzwe na Hon. David Sifuna wari uyoboye abo badepite.

Yagize ati “Twatunguwe cyane! Twabonye ko ubuyobozi bw’iki gihugu bwakoresheje imbaraga zishoboka kugira ngo ubuzima bw’abaturage bo hasi bube bwiza. Iyi ni inkuru nziza tugiye kujyana mu gihugu cyacu”.

Abaturage bo mu midugudu ya Nyagatovu na Kitazigurwa bavuga ko kubatuza hamwe byabagiriye akamaro kanini kuko aho bari batuye mbere y’uko batuzwa mu midugudu ubu bahakorera imishinga y’ubuhinzi bitewe n’uko bagiye bahuza ubutaka, ariko by’umwihariko ngo hari abari batuye mu nzu zidashobotse ariko ubu bakaba bari mu mazu meza nk’uko bivugwa na Mukabatsinda Beatrice watujwe mu mudugudu wa Kitazigurwa.

Ati “Hariho abari mu nzu zidashobotse za nyakatsi cyangwa n’izindi nzu zishaje ariko ubu turi mu mudugudu mushya kandi ibikorwa by’iterambere byose bitugeraho vuba kubera ko turi hamwe kandi n’umutekano urindirwa hamwe”.

Guverineri w’Uburasirazuba Uwamariya Odette yavuze ko intara abo badepite bahagarariye ifite ibyo ihuriyeho n’intara y’Uburasirazuba y’u Rwanda kuko zombi zifatwa nk’ibigega by’ibiribwa ku bihugu byombi.

Yongeraho ko uruzinduko rw’abo badepite ari uburyo bwiza bwo kwiga, ku buryo impande zombi zigiye zibwirana ibikorerwa muri buri gihugu byombi byatera imbere kuko buri kimwe cyajya cyigira ku kindi.

Aba badepite banasuye inzego zinyuranye mu Rwanda zirimo minisiteri y’ubutegetsi bw’igihugu, iy’umutungo kamere basobanurirwa ibijyanye na gahunda yo kwandika ubutaka, ndetse banasura na gahunda y’umushinga w’indangamuntu. Byari binateganyijwe ko basura inteko ishinga amategeko nyuma yo kuva mu ntara y’Uburasirazuba.

Cyprien M. Ngendahimana