Bavuga ko ahanini Abaturarwanda bakwiye kumenya ururimi rw’amarenga, kugira ngo bifashe abatavuga kumvwa no guhabwa servisi nk’abandi benegihugu bose.

Umuyobozi wa RNUD, Jeanne d‘Arc Ntigulirwa yagize ati: “Umuntu utumva ntavuge, ntahabwa servisi z’ubuvuzi uko biri, kuko abo asanga kwa muganga baba batazi ibyo avuze, iyo atari kumwe n’umuntu umwumva. Mu bantu bacu harimo abibasiwe na SIDA kubera icyo kibazo cyo kutabasha kumvikana n’abandi.”

Bitewe kandi no kutavugana n’abandi bantu basanzwe, abantu batumva ntibavuge ngo nta n’ubwo biborohera kubona akazi, kuko baba batamenye amakuru.

Ntigulirwa yavuze ko iyo bigeze ku muntu utumva ntavuge uvuka ku muryango ukennye cyangwa uba mu cyaro, we aba ari intabwa kuko adashobora kwiga no kugira uburenganzira na buke.

Mu bindi bihugu ngo hari amashuri yihariye ku rurimi rw’amarenga rukoreshwa n’abatumva ntibavuge, ndetse bakanagira ababahagariye mu nzego zitandukanye za Leta n’iz’abikorera.

RNUD ivuga ko yakoze ubuvugizi muri Guvernema y’u Rwanda, ikaba ifite icyizere ko itazatinda igahabwa igisubizo.

Umuyobozi ushinzwe imiyoborere myiza mu karere ka Kicukiro, Eric Karengera, avuga ko mu mashuri ya Gatagara (yigisha abafite ubumuga), abanyeshuri bahawe abarimu bazi ururimi rw’amarenga.

Karengera yagize ati: “Mu bijyanye n’ubuzima cyangwa mu zindi nzego ntibirabaho, ariko hari icyizere”.

Icyumweru cy’ubukangurambaga bwa RNUD cyatangijwe n’umuganda wo gukora isuku ku rwibutso rw’i Rebero, indi minsi ikazaba iyo gukangurira abantu kwitabira imvugo y’amarenga.

Umunsi wa nyuma wa gatanu uzarangwa n’urugendo ruva i Remera ku Giporoso rugana kuri stade nto Amahoro, aho inzego za Leta zatumiwe, zizumva ibisobanuro by’ubuzima bw’umuntu utumva ntanavuge.

Ishyirahamwe RNUD ribarura abanyamuryango barenga 500 mu gihugu hose, ariko abantu batumva ntibavuge mu Rwanda ngo baragera ku bihumbi 25, nk’uko umuryango witwa Decenie wabitangaje nyuma y’inyigo wakoze mu mwaka w’2010.

Simon Kamuzinzi