Aba bagabo bafungiye ku ishami rya Polisi rya Mageragere mu mujyi wa Kigali harimo icyenda bafatiwe mu cyuho cyo gutanga ruswa ku bapolisi ku mihanda ku itariki 14/10/2014 bakaba biyemerera ko icyo cyaha bagikoze ngo kubera gushukwa n’abo bahaye iyo ruswa ndetse no kutoroherezwa kubona ibyangombwa basabwa; gusa hari umwe ngo watorotse.

“Umupolisi yaraje aravuga ngo reba uko ubigenza kugira ngo wigendere, nanjye numva ko ngomba kumuha amafaranga, ubwo bagenzi be bahise baza bamfata nkiyamuha”, nk’uko umwe mu bafunzwe witwa Murumba Francois wafashwe aha umupolisi amafaranga ibihumbi bibiri kubera kutagira icyemezo cy’uko imodoka ye yagenzuwe ibya tekiniki.

Uwitwa Seti nawe yagize ati: “Barambwiye ngo nibwirize, bavuga ko ngomba gutanga inyoroshyo; ubwo naribwirije muha amafaranga ibihumbi bitanu kugirango ngende, nanjye kuko nari maze kugira za ‘contreventions’ nyinshi (impamuro z’ihazabu y’ibihano), namuhaye ibihumbi bitanu na lifuti, tugeze imbere bagenzi be baramfata”.

Hari abavuga impamvu z’uko batanga ruswa ngo bitewe no kutabona mu buryo bworoshye, ibyangombwa birimo uruhushya rwo gutwara ikinyabiziga (Permis de conduire), urwo gutwara ibintu n’abantu, icyangombwa cya controle techinique n’ibindi.

“Ibyo kuvuga ngo abapolisi baradushuka ni amatakirangoyi no kubeshya kuko babonye itangangazamakuru bagashaka kwigira abere n’ubwo ibyo bizemezwa n’inkiko; ibyangombwa basabwa bagakwiye kubibonera ubuntu badatekereje gutanga ruswa iyo ari yo yose; nta kigoye kirimo mu kubibona ahubwo biraterwa n’ubushake n’imyumvire mike”, nk’uko byasobanuwe n’Umuvugizi wa Polisi, ACP Damas Gatare.

Abaregwa ngo bagiye batanga amafaranga ari hagati y’igihumbi n’ibihumbi bitanu y’u Rwanda. Abajijwe impamvu uwatanze menshi kurushaho adafatwa cyangwa ngo n’abayakiriye nabo bafatwe, Umuvugizi wa Polisi yavuze ko ruswa iyo ari yo yose ihanirwa uyitanze n’uyakiriye, kandi ko Polisi ngo yerekanye inshuro nyinshi abayikorera bafatiwe mu cyuho cya ruswa.

Igitabo cy’amategeko ahana y’u Rwanda giteganya igifungo kuva ku myaka itatu kugeza kuri irindwi n’ihazabu y’amafaranga ibihumbi 100 ishobora kwikuba kugera ku nshuro 10, cyangwa kimwe muri ibyo bihano; ku muntu wese uhamwe na ruswa iyo ari yo yose.

Polisi y’igihugu kandi yerekanye abagabo batatu barimo umwe ngo ukora impushya zo gutwara ibinyabiziga, n’abandi babiri bari bashinzwe kumushakira abakiriya bazo.

Chief Inspector of Police, Emmanuel Kabanda akaba ari umuvugizi w’ishami rya Polisi rishinzwe umutekano mu muhanda, yavuze ko bakirimo guperereza neza aho uwo muntu ukora impushya mpimbano azikorera, uburyo azikora n’aho ibyo akoresha abikura.

Simon Kamuzinzi