Yagize ati "Ninde washyizeho itegeko ry’uburyo tugomba kwambaramo, imodoka tugomba kugenderamo n’ahantu tugomba gutemberera? Buri umwe muri mwe afite uburenganzira bwo guhitamo ibimubereye cyangwa bigendanye n’ubushobozi bwe."

Mme Jeannette Kagame hamwe n’urubyiruko rwitabiriye amahugurwa yabereye i Gabiro tariki 14/06/2014.

Mu ijambo yagejeje kuri uru rubyiruko rwaturutse hirya no hino mu gihugu, Jeannette Kagame yibukije ko ntacyo bimaze kurushanwa gutunga ibintu byiza badatekereje kuri ejo hazaza. Yagaragaje impungenge igihugu gifite bitewe n’uburyo abaturage cyane cyane urubyiruko rugikoresha amafaranga rutabara.

Jeannette Kagame yasabye urubyiruko ko aya mahugurwa yaberaga i Gabiro mu karere ka Gatsibo bazayavamo bazi gukoresha neza amafaranga babona, kuko aribwo igihugu gitegerejeho ejo hazaza.

Jeannette Kagame hamwe na rumwe mu rubyiruko rwitabiriye amahugurwa yari afite insangamatsiko "Achieving Financial Fitness".

Guverineri w’intara y’Iburasirazuba, Odette Uwamariya, yatangaje ko ari ngombwa ko Abanyarwanda bishakamo ibisubizo kandi bakabikora bahereye kuri bicye bafite. Nawe yibukije urubyiruko ko rugomba kubanza kuzigama mbere yo gukoresha amafaranga yabo.

Iri huriro ryateguwe n’umuryango Imbuto Foundation ku nshuro ya 21, ryatanzwemo ibiganiro birandukanye, bijyanye no kwizihamira n’ishoramari ryoroheje ariko rishobora kubyara menshi.

Jeannette Kagame hamwe n’abandi bayobozi bitabiriye amahugurwa y’urubyiruko.

Umuryango Imbuto Foundation usanzwe utegura ibikorwa biganisha ku rubyiruko, birimo kubafasha kwiteza imbere, kwirinda SIDA no gufasha urubyiruko mu myigire yabo.

Emmanuel N. Hitimana