Itangazo ryasohotse mbere y’uko Inama y’Igihugu y’Umushyikirano ya 13 itangira kuri uyu wa mbere tariki 21 Ukuboza 2015, rivuga ko inzego zishinzwe gushyira mu bikorwa imyanzuro, zigomba kurangiza isigaye bitarenze ukwezi kwa Kamena k’umwaka wa 2016.

Umushyikirano witabiriwe n’abayobozi bose bo mu gihugu, abakorera hanze n’abahagarariye ibihugu byabo mu Rwanda.

Mbere y’uko Inama y’Igihugu y’Umushyikirano ya 13 ifata imyanzuro mishya, irabanza gusuzuma uburyo imyanzuro y’ubushize yashyizwe mu bikorwa.

Insanganyamatsiko y’Umushyikirano w’uyu mwaka igira iti “Guhitamo kw’Abanyarwanda niwo musingi w’iterambere n’agaciro by’u Rwanda.”

Umushyikirano ubaye ku nshuro ya 13.

Abanyarwanda bari hirya no hino mu gihugu no hanze baraza kuba bakurikiranye iyi nama ngarukwamaka ihuza Perezida wa Repubulika, abayobozi bakuru b’Igihugu, ab’inzego z’ibanze, ndetse n’abaturage muri rusange.

Hakoreshejwe ikoranabuhanga, abaturage bari hirya no mu gihugu baragira uruhare mu gutanga ibitekerezo n’ibibazo ku ngingo zirebana n’imiyoborere y’igihugu, ubukungu, imibereho myiza n’ubutabera.

By’umwihariko mu byumba by’Inama mu turere twa Bugesera, Gisagara Burera no kuri Stade Amahoro nto, urubyiruko ruraza kuba rukurikirana kuri za televiziyo imbonankubone ibibera mu Mushukirano, aho ruza no kuba rutanga ibitekerezo n’ibibazo.

Inama y’Umushykirano kandi yitabiriwe n’abahagarariye ibihugu byabo mu Rwanda, Abanyarwanda n’inshuti zabo batuye mu mahanga,ndetse n’Itangazamakuru mpuzamahanga.

Hirya no hino mu gihugu bakurikiranye umushyikirano. Aha ni mu karere ka Bugesera.

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2475 )