Muri iki gihe ngo haracyari bamwe mu babyeyi bananiwe kwikuramo ibitekerezo bya kera birangwa n’imvugo mbi zahungabanya amahoro u Rwanda rugezeho, ngo byaba byiza babiretse kuko bitubaka.

Urubyiruko rwifuza ko ibitekerezo birimo amacakubiri bicika.

Urubyiruko rwabitangarije mu biganiro byo kwizihiza umunsi mpuzamahanga wahariwe amahoro byahuje urubyiruko rusaga 300 ku bufatanye bw’umuryango Never Again Rwanda na Komisiyo y’igihugu y’ubumwe n’ubwiyunge, kuri uyu wa mbere tariki 21 Nzeri 2015.
Mushimiyimana Louange, umunyeshuri w’imyaka 18, wari wabyitabiriye yavuze ko icyo umwana atojwe n’ababyeyi be ari cyo akurana.

Agira ati “Nukura wumva iwanyu bavuga ko ari abahinzi, uzakunda guhinga. Ukuriye mu muryango urimo ibitekerezo by’amacakubiri uzabikurana kugeza aho uzamenyera gutekereza no gusesengura.”

Hon. Byabarumwanzi Francois aganirira urubyiruko.

Mushimiyimana akomeza avuga ko mu gihe cyose umwana ataramenya gutandukanya ikibi n’icyiza, agendera ku byo ababyeyi be bamubwira cyane ko aba agomba kububaha nk’uko umuco ubimusaba.

IHonorable Byabarumwanzi François, umwe mu badepite wari witabiriye ibi biganiro unakuriye komisiyo y’ubumwe bw’Abanyarwanda no kurwanya Jenoside mu Nteko, yavuze ko ibyo n’ubwo hari ababyeyi barangwa n’ibyo bitekerezo ariko hari ingamba zo kubirwanya.

Agira ati “Ntabwo duhakana ko muri twebwe bakuru hakirimo abafite ibitekerezo by’inzangano biri no byakuruye jenoside, ariko tugerageza kubirwanya.

Bafashe umwanya wo kuvomerera igiti cy’amahoro cyatewe umwaka ushize ku munsi w’amahoro.

Hon. Byabarumwanzi yakomeje avuga ko ibi ari ingaruka z’ubutegetsi bubi babayemo ariko ko ubu bigenda bishira kubera imiyoborere myiza iri mu gihugu, ikangurira abanyarwada kubana mu mahoro.

Umuyobozi wa Never Again Mahoro Eric, yavuze ko urubyiruko rwahuriye hamwe n’intumwa za rubanda kugira ngo baganire ku mahoro ndetse n’uburyo ibikorwa by’urugomo biyahungabanya byaburizwamo.

Munyantore Jean Claude