Kuva iyi mirwano yakubura taliki 14/7/2013 abajya mu mujyi wa Goma bavuga ko hari Abanyarwanda benshi bari gufatirwa mu mujyi wa Goma bakitwa abarwanyi ba M23 bagahita batwarwa gufungirwa ahantu hatazwi.

Umwe mu bashoboye kurokoka ibi bikorwa by’urugomo witwa Uwimana, ubwo Kigali Today yamusangaga ku mupaka muto uhuza Rubavu na Goma yayitangarije ko yafashwe mu masaha ya saa yine tariki 16/07/2013 yinjiye mu mujyi wa Goma maze agafatwa n’abantu bambaye imyenda isanzwe bakamukubita bamwita intasi ya M23 aho bahise bamushyira abasirikare nabo bakamukubita bakamutegeka kwicara hasi.

Mu buhamya Uwimana atanga, avuga ko yambuwe ubusa mu mujyi wa Goma akawutambagizwa yashyizweho amapingu, ariko by’amahirwe abasirikare bamufashe bakabura imodoka ya mujyana bigatuma polisi isaba ko imufungira aho ikorera ku mupaka aho yahaswe ibibazo n’inkoni ariko akaza no kubona uko ahamagara umuryango we uri mu Rwanda ugatabaza inzego z’abinjira n’abasohoka zashoboye kugaragaza ko asanzwe ari Umunyarwanda kandi akorera Goma na Gisenyi akaza kurekurwa.

Uwimana nyuma y’ibyamubayeho avuga ko atazi icyo yakubiswe azira kuko n’abamukubitaga atabarebaga mu maso, cyakora ngo yababajwe cyane, akaba asaba abantu bose bajya mu mujyi wa Goma kubihagarika kuko ibyo bashaka bitaruta ubuzima bwabo.

Ubuyobozi bw’akarere ka Rubavu busaba abaturage guhagarika ingendo zijya mu mujyi wa Goma kubera ihohoterwa bakorerwa, ndetse bamwe bakaburirwa irengero, bamwe bakaba aribo bitwa ko ari abarwanyi ba M23 kuko bajya gufungirwa ahatazwi.

Abanyecongo bifite batangiye guhunga

Kubera iyo ntambara ikomeje hagati ya M23 n’ingabo za Congo, abaturage batuye mu duce twa Muja, Mutaho, Muningi na Kibati, Kirimanyoka na Bisheke bakomeje kuva mu byabo kuko intambara irushaho kwiyongera.

Umwe mu batashatse ko amazina ye atangazwa, ari kumwe n’umuryango we ubwo bari bafashe bisi ya Jaguar berekeje muri Uganda tariki 16/07/2013 yagize ati “nubwo intambara ivugira hafi y’umujyi wa Goma ingabo za MONUSCO na FARDC zikavuga ko zizawurinda, ntawamenya ibyazo, ni byiza ko umuntu ajyana abana kure, aho batumva urusaku rw’amasasu .”

Impande zose zikomeje kwigamba itsinzi zivuga ko zihagaze neza mu birindiro byazo nubwo abegereye umujyi wa Gisenyi batari kumva amasasu nkuko byahoze taliki ya 14 na 15/7/2013 ahubwo asa n’ayagabanutse.

Impunzi 666 nizo zahungiye mu Rwanda taliki 14/07/2013 zivuye mu duce twa Kirimanyoka na Bisheke bakaba bagicumbikiwe n’abaturage mu murenge wa Busasamana kuko bataremera kujya mu nkambi ahubwo bavuga ko bategereje ko intambara irangira bagasubira mu ngo zabo.

Umukozi wa Minisiteri ishinzwe gucunga Ibiza no gucyura impunzi (MIDIMAR), Ntawukuriryayo avuga ko bafasha impunzi zageze mu nkambi zakiriwe na HCR ariko aba batarakirwa kuko bakiri mu maboko y’akarere.

Nyamara nubwo izi mpunzi zanze kujya mu nkambi, aho bari batuye taliki ya 16/07/2013 niho hibasiwe n’ibisasu by’ingabo za Congo FARDC ahitwa Bisheke na Kirimanyoka inyuma ya Muningi na Kibati.
Sylidio Sebuharara

Sylidio Sebuharara