Dusabimana Gloria wo mu murenge wa Janja, akarere ka Gakenke atangaza ko yumvishe kuri radiyo iby’ikigega Agaciro Development Fund yumva bimufitiye akamaro bityo bituma aza kwifatanya n’abandi muri icyo gikorwa.

Ubwo igikorwa cyo gukusanya inkunga cyari kirimbanyije, Dusabimana yasabye ijambo kimwe nk’abandi bantu bakuru, aratambuka ajya imbere.

Mu bwoba bwinshi bugaragarira mu mvugo kubera kutamenyera kuvugira imbere y’imbaga nini y’abantu yatanze inkunga ye y’inkoko. Yagize ati: “Mbanje gusuhuza imbaga nyamwinshi iri hano abaminisitiri, abayobozi b’akarere, umuyobozi w[ingabo] na polisi …nari ntunze inkoko ebyiri nanjye nitanze inkoko imwe.”

Iyo nkoko yahawe agaciro k’ibihumbi bine by’amafaranga y’u Rwanda.

Niyonambaza Asumani, Umuyobozi w’Ikinyamakuru Rugali inkunga y’uwo mwana yamukoze ku mutima maze ahita ashumbusha inkoko eshanu zifite agaciro k’ibihumbi 50 mu rwego rwo guha agaciro ubutwari n’ibitekerezo by’uwo mwana ufite inyota yo guteza imbere igihugu cye; nk’uko Niyonambaza abitangaza.

Ashimangira ko uwo mwana kimwe na bagenzi be ari bo bazaba bakora ibyo abantu bakuru barimo gukora uyu munsi birimo gukusanya inkunga yo gushyigikira ikigega Agaciro Development Fund ndetse no kuba abayobozi b’ejo hazaza.

Niyonambaza kandi yatangiye abandi bana ibihumbi 150 mu rwego rwo kubashishikariza kwihesha agaciro no gukurikiza urugero rwiza rw’uwo mwana.

Dusabimana avuga ko izo nkoko eshanu zizamufasha kwiteza imbere akazakomeza gushyigikira ikigega AgDF. Ati: “Ni iterambere ryanjye kandi n’iry’igihugu, nzakomeza nzorore n’ikindi gihe nzajya nshyiramo (Ikigega AgDF) nta kibazo.”

Muri icyo gikorwa, mu karere ka Gakenke hakusanyijwe miliyoni 414 n’ibihumbi 238 n’amafaranga 434.

Nshimiyimana Leonard