Akarere ka Rutsiro ni ko ka mbere uyu mushinga ugiye gukoreramo mu Rwanda, ariko nyuma yaho ukazakomereza no mu tundi turere. uretse mu Rwanda, uyu mushinga unakorera mu bihugu by’u Burundi na Kenya.

Nkera Remy Alphonse ushinzwe ubuvugizi bw’umushinga mu Rwanda, u Burundi ndetse na Kenya avuga ko umushinga UBUNTU CARE ugamije kurwanya ihohoterwa rikorerwa abana, cyane cyane abafite ubumuga butandukanye burimo ihungabana ryo mu mutwe, abana batabona ndetse n’abatavuga.

Yagize ati: “Abo bana bakunze guhura n’ihohoterwa rishingiye ku gitsina, uwo mushinga rero ushaka gufatanya n’inzego zitandukanye mu kurwanya icyo kibazo kugira ngo umuryango Handicap International utange inkunga yawo mu kubaka ejo hazaza h’urubyiruko n’iterambere ry’igihugu muri rusange”.

Umuyobozi w’akarere ka Rutsiro wungirije ushinzwe imibereho myiza y’abaturage, madame Nyirabagurinzira Jacqueline, avuga ko mu karere hari hasanzwe ingamba nyinshi zo kurwanya ihohoterwa rikorerwa abana ariko noneho uyu mushinga na wo ngo bawishimiye kuko uje ari inyongera.

Ati: “Icyo tuwutezeho ni uko iryo hohoterwa rizaranduka burundu, noneho abana bakabaho mu burenganzira bwabo, biga neza amashuri, bakagera ku rwego rushimishije ndetse n’ubufasha bundi bahabwa bukabagirira akamaro kugira ngo bashobore gufatanya n’abandi”.

Umushinga UBUNTU CARE uzamara imyaka itatu ishobora kongerwa.Handcap International ni umuryango mpuzamahanga wita ku bibazo by’ababana n’ubumuga.

Malachie Hakizimana