Maj Gen Prime Niyongabo, uyoboye Igisirikare cy’u Burundi yaje mu butumwa bw’iminsi itatu mu Rwanda, gushimangira umubano hagati y’igisirikare cy’ibihugu byombi, ku birebana n’umutekano, guhanahana amakuru, ndetse no kubaka ubushobozi bw’inzego za gisisirikare z’ibihugu bisanzwe ari ibivandimwe.

Umugaba mukuru w’Igisirikare cy’u Burundi n’itsinda ayoboye, yageze mu Rwanda kuri uyu wa mbere tariki 17/06/2013, aho yakiriwe na mugenzi we uyoboye Ingabo z’u Rwanda, Lt Gen Charles Kayonga, anaganira na Ministiri w’ingabo, Gen James Kabarebe, ku mikoranire yo kunoza umutekano mu Rwanda no mu Burundi.

“Maj Gen Niyongabo n’itsinda ayoboye, baganiriye na Lt Gen Charles Kayonga ndetse n’abandi bakuru b’Ingabo zacu, ku birebana n’ubufatanye mu gukomeza umutekano, guhanahana amakuru hamwe no kubaka ubushobozi bw’inzego z’igisirikare zombi”, nk’uko Umuvugizi w’Ingabo z’u Rwanda, Brig Gen Joseph Nzabamwita yabishimangiye.

Abasirikare b’u Burundi bari mu ruzinduko mu Rwanda bafata ifoto y’urwibutso hamwe n’abayobozi mu gisirikare cy’u Rwanda.

Umugaba mukuru w’Ingabo z’u Burundi, yanasuye urwibutso rwa Jenoside rwa Kigali, aho yatangarije ko ari umuhamya w’ububi bwa Jenoside.

“Ibyabaye biteye ubwoba, kandi Jenoside si icyaha cyo gucecekwa ahubwo buri wese agomba kuyirwanya, yaba mukuru cyangwa muto”, Maj Gen Prime Niyongabo, uyoboye Igisirikare cy’u Burundi.

Biteganijwe ko Umugaba mukuru w’Ingabo z’u Burundi, asura ibikorwa by’Igisirikare cy’u Rwanda birimo Ikigo cy’imari cya Zigama (CSS), Ubwishingizi bw’Ingabo (MMI), hamwe n’ikigo cya girikare kiri i Gako mu karere ka Bugesera.

Uruzinduko rw’akazi Umugaba mukuru w’ingabo z’u Burundi agiriye mu Rwanda, rubaye nyuma y’uko mu kwezi kwa kane k’uyu mwaka, Lt Gen Charles Kayonga, Umugaba mukuru w’Ingabo z’u Rwanda nawe yasuye Igisirikare cy’u Burundi.

Abasirikare bakuru ba Ethiopia baje mu Rwanda kwigira kuri bagenzi babo b’abagore

Kuri uyu wa mbere tariki 17/06/2013, kandi Igisirikare cy’u Rwanda cyakiriye abasirikare bakuru batatu bagize ishami ry’abagore mu ngabo za Ethiopia baje mu Rwanda kwigira kuri bagenzi babo uruhare rw’abasirikare b’abagore mu kubohora igihugu, guharanira iterambere no kubungabunga amahoro.

Abasirikare bo muri Ethiopia b’abagore basobanurirwa uruhare rw’abasirikare b’abagore mu iterambere ry’u Rwanda.

Abasirikare ba Ethiopia bayobowe na Col Leterbrhan Kahasy Berish, bakiriwe mu Rwanda n’Umugaba mukuru w’Ingabo, Lt Gen Charles Kayonga, Ministiri w’ingabo Gen James Kabarebe, ndetse na Maj Margaret Batamuriza ushinzwe uburinganire mu ngabo z’u Rwanda, wunganiye mu ifasha myumvire, ku bikorwa by’Igisirikare cy’u Rwanda.

Uruzinduko abasirikare ba Ethiopia bagiriye mu Rwanda ruzamara iminsi itanu, aho babanje gusura ubwibutso rwa Jenoside ruri ku Gisozi, bunamiye imibiri y’abaharuhukiye isaga ibihumbi 250, ndetse bahigira amateka y’irondakoko yahereye mu gihe cya gikoloni, agaragazwa kuba ari yo mizi ya Jenoside yakorewe Abatutsi mu 1994.

Abasirikare ba Ethiopia bakiriwe na Minisitiri w’Ingabo n’umugaba mukuru w’ingabo.

Ku rwibutso rwa Jenoside, Col Leterbrhan Kahasy yahatangiye ubutumwa bugira buti: “Mbonye urwibutso; biragoye kubyumva kuko birababaje cyane, ariko ndatekereza ko abantu bashobora guhindura ikibi kigahinduka icyiza, kandi ndabona ari yo nzira iki gihugu (cy’u Rwanda) kirimo.”

Simon Kamuzinzi