Astou Fall yerekana ko iyo u Rwanda ruramuka rudakolonijwe n’Ababiligi rwari rufite amahirwe yo kutagwa mu byago nk’ibyo rwaguyemo mu gihe cya Jenoside.

Mu bibazo yagiye akoraho ubushakashatsi yagiye yibanda ku mateka y’u Rwanda, aho yaganiriye n’Abanyamateka b’Abanyarwanda n’abanyamahanga.

Ubu bushakashatsi budatandukanye cyane n’ubundi bunyuranye bwagiye bukorwa, bwerekana ko mbere y’umwaduko w’abazungu b’Ababiligi mu Rwanda abahutu n’abatutsi bari babanye neza.

Avuga ko Jenoside n’irondamoko byaranzwe mu Rwanda byakomotse ahanini ku Babiligi batonesheje Abatutsi bashaka kwerekana ko aribo bashoboye byose kandi aribo bakwiye gukorana nabo. Bimirizwa imbere muri byose ndetse baba ari nabo bemererwa kwiga.

Ibi byose Ababiligi babikoze kuko bari bafite umurongo ngenderwaho bari barihaye wo gucamo Abanyarwanda ibice ngo bakunde babayobore (divide and rule).

Ubu bushakashatsi bwa Fall bwerekana ko ishyirwaho ry’indangamuntu zari zanditsemo amoko ari ryo ryagize uruhare runini mu gucamo Abanyarwanda ibice. Ubusanzwe ngo Abanyarwanda ntibiyumvaga muri ubu bwoko.

Byageze hagati abazungu bahindura imitoneshereze yabo kuko Abatutsi basaga n’abari ku ibere barikuweho noneho bakimika Abahutu, binyuze ahanini muri kamarampaka.

Aha ababiligi bumvishije abahutu ko ibyakozwe ku ngoma y’Ababiligi byakorwaga n’Abatutsi.

Ubushakashatsi bwerekana ko ubu bwoko bw’Abahutu, Abatutsi n’Abatwa, bwari baringa kuko abazungu babushyizeho bakurikije umutungo w’Abanyarwanda ndetse banifashisha imiterere y’abantu, aho bo ubwabo bipimiraga indeshyo, amazuru, iminwa, n’ibindi bice by’umubiri w’umuntu ku buryo hari n’aho wasangaga abavandimwe bari mu bwoko butandukanye.

Gerard GITOLI Mbabazi