Budensiyana avuga ko ihohoterwa yakorewe rirenze ukwemera, kuko umugabo we bari bamaze amezi umunani batabana, ariko agatinyuka kumukorera ubugome bugera hariya kandi yabigambiriye.

Arasaba ubuyobozi n’ababyeyi kumva ibibazo by’abana ba bo bababwira ko bahohoterwa, bakabafasha gutandukana n’abo bashakanye bitaragera kure.

Uwo mugabo wahohoteye Budensiyana ntibari barasezeranye mu buryo bwemewe n’amategeko. Ku bw’iyo mpamvu ngo ntatekereza kuba yasubirana na we. Yewe ngo n’aho yasubirana isura ntashobora gushaka umugabo.

Ubwo twamusangaga ku kigo nderabuzima cya Musambira, aho yaje kurwarira nyuma yo kuvurwa n’ibitaro byitiriwe Umwami Fayisali, isura ye yarahindanye, aracyafite ibisebe ku ngingo zimwe na zimwe, ngo kuryama biramugora ku buryo bimusaba kuryamisha urubavu rumwe ndetse n’ijisho rimwe ntiribona.

Kuba ameze atyo ariko, uyu mugore avuga ko bitameze nka mbere kuko yari yarihebye atabasha kwambara n’umwenda. Ngo iyo yawambaraga wahitaga uhindanywa n’amashyira.

Arashimira umuryango w’abanyakoreya Good Neighbors wamuhaye ubufasha bwo kumuvuza mu bitaro by’Umwami Fayisali.

Nk’uko twari twabitangaje, Budensiyana yari yatwitswe n’umugabo we Bizimungu Joseph, tariki 06/08/2012, amumennyeho amavuta ashyushye, maze ahita atoroka.

Abababyeyi b’umugabo bahise batabwa muri yombi bakekwaho ubufatanya cyaha, kugeza ubu Bizimungu akaba ataraboneka.

Marie Josee Uwiringira