Iyi Kompanyi ngo yubaka amapoto y’umuriro w’amashanyarazi kuva Kagitumba mu Karere ka Nyagatare kugera mu Karere ka Gasabo mu Mujyi wa Kigali.

Sima yibwe ikaba ari iyakoreshwaga mu gushyigikira aya mapoto y’ibyuma. Nyirabizeyimana Claudine, umukozi wo mu rugo ukorera abantu bacumbitse mu gipangu cya Mwizerwa Assaf bita Kabila, ngo yiboneye n’amaso ye inshuro umushoferi wa Kompanyi Bouygues, Muvunyi Rangira Gratien, na we wacumbikaga muri iki gipangu apakurura sima abifashijwemo na kigingi we ndetse ngo na nyir’igipangu na we akenshi yazaga nyuma y’uko sima ihageze.

Kugira ngo izi sima ziboneke ni amakuru yatanzwe n’abaturage. IP Emmanuel Kayigi, Umuvugizi akaba n’Umugenzacyaha wa Polisi y’Igihugu ikorera mu Ntara y’Iburasirazuba arashimira abaturage bakomeje gufasha Polisi mu gutahura ibyaha anashishikariza n’abandi kubikora.

Ngo nta muturage uzahutazwa kuko yatanze amakuru bityo buri wese akwiye gushirika ubwoba ibyo agizeho amakenga akabimenyesha polisi y’igihugu.

Nubwo tutashoboye kumenya uko igura sima yafashwe ngo ikorerwa mu gihugu cya Misiri.

Mu bindi byibwe iyi kompanyi harimo umucanga munini n’umuto imodoka 7 ndetse n’amabuye ahonze imodoka 2.

Aka kazu umuntu ahagaze mu muryango ni ko kari ububiko bwa Sima.

Abakekwaho ubufatanyacyaha muri ubu bujura na nyir’igipangu byafatiwemo ndetse n’umushoferi wabihagezaga bose baburiwe irengero bakaba bagishakishwa.

Umushoferi we akaba ngo yaranataye imodoka mu nzira ari mu kazi akimenya ko ashakishwa na Polisi.

SEBASAZA Gasana Emmanuel