Abinyujije ku rubuga rwe rwa Twitter, yanasabye abatwara moto mu mujyi wa Gisenyi, kutishima bakarenza bakibagirwa umutekano w’abo batwaye.

Yabivuze nyuma yo kubona uburyo Abanyarwanda bishimiye gutsinda ikipe ya Congo, ndetse abamotari bakishima bihuta birenze urugero hamwe no kwitambika mu muhanda bishimisha.

Abanyekongo benshi bari baje kureba ikipe yabo izakina imikino ya CHAN izatangira mu Rwanda tariki ya 16 Mutarama, ariko mbere yo kujya aho izakinira mu Karere ka Huye, babanje gukina umukino wa gicuti n’ikipe y’u Rwanda Amavubi.

Abanyekongo batahiriwe n’uyu mukino, batangiye gusohoka muri Stade Umuganda umukino utararangira ku munota wa 80 nyuma y’uko babonye badashoboye kwishyura igitego batsinzwe n’Amavubi ku munota wa 50.

Nyuma y’intsinzi y’Amavubi, Minisitiri w’Umuco na Siporo, Uwacu Julienne, na we abinyujije kuri Twitter, yashimiye abafana b’Amavubi n’Abanyarubavu muri rusange uburyo bitwaye neza mu gushyigikira ikipe yabo.

Umukino wa Congo n’u Rwanda nubwo wari umukino wa gicuti, wari umukino ufite icyo uvuze ku baturage bagize ibihugu byombi kuko bari bafite ishyaka ryo gutsinda.

Ikipe ya Congo yavuye Kinshasa ije gukina umukino wa gicuti n’ikipe y’Amavubi, ntiyashoboye kwiyereka abafana bayo, bituma Abanyekongo batuye mu mujyi wa Goma bifuza kuza kuyirebera mu Rwanda ari benshi nk’uko bari basabwe n’abatoza ko bifuza ko Abanyekongo baba hafi.

Umukino wa gicuti wa Congo n’u Rwanda watumye umupaka wa Congo ufungurwa amasaha y’ikirenga, mu gihe wari usanzwe ufungwa saa kumi n’ebyiri z’umugoroba, ubuyobozi bw’Intara ya Kivu y’Amajyaruguru bwategetse abinjira n’abasohoka ku ruhande rwa Congo kongera amasaha yo gufunga.

Ubuyobozi bw’Akarere ka Rubavu, mbere y’uko umukino utangira, bwari bwatangaje ko Abanyekongo bazaza kureba umukino nibashaka bazarara.