Ibi bicumbi by’indangagaciro ni ibikorwa bigaragara mu mirenge itandukanye y’akarere ka Huye,ariko by’umwihariko bigaragara muri buri kagari k’umurenge wa Kinazi nawo uherereye mu karere ka Huye.

Ndayambaje Ciprien ni umwe mu baturage bo mu murenge wa Kinazi, wafashe iya mbere mu gutanga umusanzu we mu kwimakaza indangagaciro z’umuco nyarwanda.

Aravuga akamaro k’ibi bicumbi by’indangagaciro ku Banyarwanda anashishikariza ababifata nk’umutako gusa gushishoza bakareba icyo ubutumwa bubiriho bubasaba.

Ati “Ibi bitwibutsa abo turibo n’aho tugana, ndasaba rero ababibona nk’imirimbo gusa ko bajya bitonda bakanasobanukirwa ubutumwa bwanditseho”.

Umunyabanga nshingwabikorwa w’umurenge wa Kinazi, Migabo Vital, avuga ko ibi bicumbi by’indangagaciro bifasha umutaruge kumenya aho ageze akanasobanukirwa n’imico iranga abantu baho n’imirimo y’ingenzi itunze abahatuye.

Ati “Hari nk’ibigaragaraho inka, ni ukuvuga ko muri ako gace hakorerwa ubworozi bw’inka cyane, ibindi bigiye biriho za kirazira n’ubundi butumwa bugamije gufasha abaturage uko bagomba kwitwara”.

Uretse mu murenge wa Kinazi wo mu karere ka Huye ibi bicumbi by’indangagaciro bigaragara muri buri kagari no mu yindi mirenge itandukanye yo mu turere twa Huye na Ruhango.

Ibi ibicumbi bigamije kwibutsa imyitwarire ikwiriye Umunyarwanda nyawe bikanagaragaza ibikorwa ndangabukungu by’ingenzi bigaragara mu bice ibyo bicumbi biherereyemo.

Clarisse Umuhire