Uru rugendo rwahereye kuri ETO Kicukiro, rwabimburiwe n’ubuhamya bwatanzwe na Karasira Venuste werekanye inzira y’umusaraba Abatutsi bagiriye muri ETO Kicukiro mu gihe cya Jenoside yakorewe Abatutsi, bamaze gutereranwa n’ingabo zahoze ari iz’umuryango w’abibumbye zari mu Rwanda (MINUAR).

Nyuma y’ubwo buhamya, urugendo rwakomereje ku rwibutso rwa Jenoside rwa Nyanza, aho aba bamotari bahise bashyikiriza sheki ingana na miliyoni ebyiri ikigega Agaciro Developpment Fund, bagaragaza ko bashishikajwe no guteza imbere igihugu cyabo, kandi bagomba gutanga umusanzu mu iterambere ryacyo.

Ngarambe Daniel uyobora SYTRAMORWA, yatangaje ko iki gikorwa bagikoze kuko bababajwe n’iriya filime ipfobya Jenoside yakorewe Abatutsi kandi ikaba ivuga nabi umuyobozi w’igihugu ubafatiye runini mu iterambere, kandi wahagaritse ayo mahano amahanga yabatereranye.

Yagize ati: “Twebwe nk’amakoperative abumbiye muri SYTRAMORWA twababajwe cyane n’iyi filime Rwanda The Untold Story yacishijwe kuri BBC igoreka amateka, ikanagaragaramo gupfobya Jenoside yakorewe Abatutsi yabereye mu Rwanda, kandi yarabaye twebwe abanyarwanda tubyirebera.

Tunababazwa kandi n’uburyo muri iriya filime bavuga nabi Nyakubahwa Perezida wa Repuburika Paul Kagame wayihagaritse ubu akaba agejeje Abanyarwanda ku iterambere rigaragarira buri wese mu Rwanda ndetse no ku isi hose”.

Yakomeje avuga ko icyabateye kujya mu muhanda bamagana BBC kwari ukwerekana ko badakeneye ibibabeshya bibagorekera amateka, ko batangaga umusanzu bamagana BBC n’abandi bose bayihishe inyuma, banereka abanyamahanga ko Abanyarwanda bafite icyerekezo cyiza bashaka kujyamo cyimakaza umutekano n’amahoro ko kandi nta munyarwanda ukwiye kuzongera gusubira mu icuraburindi.

Daniel yanatangaje kandi ko banatanze umusanzu mu kigega cy’Agaciro Developpment Fund bashaka kwereka amahanga ko batazahwema kwihesha agaciro no kugahesha igihugu cyabo, banereka amahanga ko atagomba kwitwaza inkunga batera u Rwanda ngo barugorekere amateka.

Roger Marc Rutindukanamurego