Byatangajwe n’Umuyobozi w’Akarere ka Kamonyi Wungirije ushinzwe Imibereho Myiza y’Abaturage, Uwera Marie Alice, mu kwizihiza ku nshuro ya 25 Umunsi Mpuzamahanga w’Umwana w’Umuyafurika, wabaye ku wa kabiri tariki 16/6/ 2015, mu Kagari ka Mbati mu Murenge wa Mugina.

Yagize ati ″Kwizihiza uyu munsi ni uburyo bwo kwongera kwibutsa isi yose kurushaho gukora ibikorwa bibungabunga uburenganzira bw’abana no gufata ingamba zihariye zo kurwanya ihohoterwa ribakorerwa“.

Uyu muyobozi yongeraho ko bidakwiye ko abana bavutswa uburenganzira bwabo, aho usanga hakiri abana bakoreshwa imirimo itabagenewe cyangwa ivunanye bityo bikagira ingaruka mbi ku hazaza habo.

Abana b’abanyeshuri bo ku Mugina barashimira Leta y’u Rwanda idahwema kugaragaza umuhate mu kwita ku burenganzira bwabo.

Uwitwa Iyaturinze Alice avuga ko bazakomeza kugaragariza ubuyobozi ahakiri ikibazo ku guharanira uburenganzira bwabo, bujyanye no guta ishuri bajya mu yindi mirimo itabagenewe.

Arahamagarira bagenzi be gukunda ishuri kuko ari umusingi w’ubuzima bw’igihe kiri imbere, ariko bakarushaho no gufatanya n’ababyeyi babo mu bikorwa biteza imbere igihugu, hibandwa ku kwita ku byo bashinzwe.

Hashize imyaka 25 hizihizwa umunsi mpuzamahanga w’umwana w’Umunyafurika. Uyu munsi ukaba warashyizweho mu rwego rwo kwibuka abanyeshuri bagera ku 176 baguye mu myigaragambyo yabereye i Soweto gihugu cy’Afrika y’Epfo, mu mwaka wa 1976, baharanira uburenganzira bw’abo.

Insanganyamatsiko y’uyu mwaka ku rwego rw’Afurika iragira iti ”Duhagurukire rimwe, turwanye gushaka imburagihe ku mwana w’umunyafurika”. Mu Rwanda insanganyamatsiko y’uyu mwaka ikagira ngo“ Turusheho guhuza imbaraga twita ku burere mbonezamikurire y’umwana”.

Marie Josee Uwiringira