Umuvunyi mukuru wungirije, Kanzayire Bernadette, yavuze ko ari gahunda yashyizweho n’inama yayobowe na Minisitiri w’intebe aho basuzumaga ibibazo by’imitungo y’abarokotse Jenoside bagasanga hari bimwe bitarakemuka, bituma babisuzumwa ngo bifatirwe umwanzuro.

Kanzayire avuga ko gahunda yabo ari ukuzagera mu gihugu hose bakemura ibibazo bitandukanye by’abacitse ku icumu no kureba abadafite aho baba bagasiga babikemuye.

Mu bibazo byakemuwe mu karere ka Kirehe harimo ibishingiye ku masambu aho wasangaga amasambu yarasaranganyijwe abaturage abacitse ku icumu badahari nyamara bo ntaho bafite ho kuba hafatwa umwanzuro wo kubashakira aho baba.

Nirere Florence ni umudamu wabaga mu isambu y’uwacitse ku icumu mu kagari ka Rubaya mu murenge wa Mpanga, avuga ko kuba baramukatiye iyi sambu mu gihe cy’isaranganya nta cyaha afite akaba avuga ko ahubwo kuba bamwemereye kumuha iyindi nta kibazo abibonamo akaba avuga ko nawe abyishimiye kuko ba nyirayo bahoraga bavuga ko yabambuye isambu yabo.Ibibazo nk’ibi byakemuwe mu mirenge ya Gatore, Kigina na Mpanga.

Itsinda ryakemuye ibyo bibazo rigizwe n’uhagarariye Minisiteri y’ingabo z’igihugu, Minisiteri y’ubutabera, Minisiteri ifite umuco mu nshingano zayo, Minisiteri y’umutekano, uhagarariye ingabo na polisi, ikigega cy’abacitse ku icumu, uhagarariye komisiyo y’igihugu ishinzwe kurwanya Jenoside hamwe n’uhagarariye Minisiteri y’ubutegetsi bw’igihugu, bakaba bakemuye ibibazo bitandukanye by’abacitse ku icumu bitandukanye

Grégoire Kagenzi