Abaturage bo mu Mirenge ya Gakenke na Minazi bahamagariwe kurwanya imirire mibi banywa amata banarya indyo yuzuye. Ibyo byagarutsweho nyuma y’umuganda wabereye mu Tugari twa Raba na Buheta kuri uyu wa gatandatu tariki ya 28/01/2012.

Umuyobozi Mukuru muri Minisiteri y’Iterambere ry’Umuryango, Karekezi Alfred yashishikarije abaturage kurya indyo yuzuye igizwe n’ibitera-imbaraga, ibirwanya-indwara n’ibyubaka-umubiri ndetse no kunywa amata.

Yasabye abaturage kwihutisha gahunda ya Girinka kugira ngo Umunyarwanda wese atunge kandi abashe kubona amata yo kunywa.

Icyo gikorwa cyaranzwe no gutoza abana n’abantu bakuru kunywa amata, ndetse hanorozwa abandi baturage badafite amatungo inka zirindwi, ihene 18 n’inkwavu eshanu.

Iyo gahunda yo kurwanya imirire mibi izamara umwaka yabanjirijwe n’umuganda rusange ngaruka-kwezi wo gutunganya umuhanda wa Gakenke-Rushashi. Hakozwe ibirometero bitanu byahawe agaciro ka miliyoni imwe n’igice y’amafaranga y’u Rwanda.

Nshimiyimana Leonard